El ‘Martes de Campu’ enllena’l Parque San Franciscu nuna xornada de bon tiempu n’Uviéu

Redacción.

Miles de carbayones celebraron ayeri la fiesta del ‘Martes de Campu’ nel Parque San Franciscu d’Uvieu y n’otres zones verdes del conceyu pa dar bona cuenta del tradicional bollu preñáu y del vinu. Anque la xornada amenzaba con, polo menos orbayu, el tiempu respetó la celebración uviedina d’esti añu. La Sociedá Proteutora de la Cofradía de La Balesquida ye la organizadora d’esti eventu na capital d’Asturies.

Esta sociedá repartió ayeri bollos preñaos y botella de vinu ente los más de 7.000 afiliaos que tien y ente los 1.000 cofrades que formen parte d’esta organización. Nel actu participaron dellos grupos folclóricos y bandes de gaites. La xornada entamó cola tradicional misa na capiella de La Balesquida y darreu entamaron los pasucáis dende la Plaza la Catedral al Parque de San Franciscu.

La fiesta tien el so orixe na participación na procesión de la Virxe de la Esperanza, qu’organiza la cofradía más vieya de tol estáu, yá qu’esiste dende 1232, cuando una vecina d’Uvieu, Balesquida Xiraldez fizo una bayurosa donación de bienes y ropa la cofradía de xastres. Un abellugu pa probes tomó’l so nome. Nel añu 1930 creóse la Sociedá Proteutora d’esta celebración pa que siguiere la celebración nel tiempu y anguaño la fiesta ta dafechu enxertada nes cites culturales y relixoses de la capital d’Asturies.