Doce investigadores tracen la primer hestoria del periodismu asturianu

La prensa asturiana yá tien hestoria. Un llibru ellaboráu por doce investigadores de la Universidá d’Uviéu y editáu en comuña cola Asociación de la Prensa, debuxa la evolución del periodismu asturianu dende la so apaición como tal, a primeros del sieglu XIX, hasta la Primer Guerra Mundial. Dambes entidaes preparen yá un segundu volume que-y dará continuidá cronolóxica a la investigación yá asoleyada.

La prensa d’Asturies nun contaba con un estudiu monográficu estensu qu’analizare la so hestoria, sacante dalgunes incursiones puntuales y una aprosimación asoleyada en 1976 por Manuel Fernández Avello cola casa editorial Ayalga, polo que’l profesor de la Universidá d’Uviéu Jorge Uría, cordinador de la nueva obra, sorrayó la importancia de la investigación acabante espublizar pol so calter pioneru.

Daqué con especial importancia nun llugar -Asturies- que nun cuenta con estudios superiores de Periodismu nin tampocu con un colexu profesional del gremiu, pero que dende hai dos sieglos amuesa una destacada vitalidá nos procesos de comunicación periodística. Exemplu d’ello foi’l diariu ‘El Noroeste’, vinculáu al director Antonio Oliveros, qu’al rodiu de 1914 tiraba unos 10.000 exemplares diarios.

‘Historia de la prensa en Asturias. Nace el cuarto poder’ respuende a la investigación d’una docena d’espertos n’estremaos archivos y hemeroteques, a la gueta d’un análisis de la vinculación ente los hechos hestóricos de cada dómina y el so reflexu nel papel de les páxines de los periódicos del momentu.