Una nueva oficina reforzará dende Madrid el vínculu ente los emigrantes

Una nueva oficina instalada en Madrid mirará pol bon funcionamientu y les necesidaes de los más de cien Centros Asturianos espardíos pol planeta. Sedrá l’aplicación más inmediata del conveniu, dotáu con 13.000 euros añales, que’l Gobiernu autonómicu y la Federación Internacional de Centros Asturianos (FICA) firmaron esta tarde n’Uviéu, col envís d’asegurar un vínculu estable ente los asturianos emigraos.

El documentu, que rubricaron na sé de la Conseyería de Xusticia, Seguridá Pública y Relaciones Esteriores el titular d’esti departamentu, Francisco Javier García Valledor, y el presidente de la FICA, José Luis Casas Villanueva, tendrá una continuidá añal y permitirá-yos a los representantes de los asturianos emigraos aconceyase más d’una vegada al añu, periodicidá que veníen manteniendo hasta agora con un alcuentru añal en Colombres.

Amás, los directivos de la Federación de Centros Asturianos emplegarán l’ayuda del Principáu pa esplorar ‘in situ’ los pruyimientos y la situación de les distintes comunidaes d’asturianos nel esterior, de móu que se fortalezan los llazos ente toes elles cola FICA como catalizador.

Momentos antes de la firma’l conveniu, a la que tamién asistió el director de l’Axencia Asturiana d’Emigración, Luis Miguel Fernández Romero, el conseyeru de Xusticia y Relaciones Esteriores destacó’l papel de la Federación de Centros Asturianos na promoción esterior del país y na difusión de la llingua y cultura asturianes, y xustificó’l conveniu como una midida qu’esclúi a la FICA de la convocatoria xeneral d’ayudes a los colectivos d’emigrantes pa da-y “un soporte económicu estable”.

García Valledor aprovechó la so comparecencia pública p’anunciar amás el compromisu’l Gobiernu autonómicu d’entamar nel estranxeru una cellebración del Ocho de Setiembre paralela a la se fai n’Asturies. Según Valledor, la intención del Executivu ye que cada añu, a partir d’esti mesmu, seya un país distintu el qu’acueya los actos conmemorativos, pa facilitar la participación de los asturianos emigraos a mui estremaos llugares.