Dixebra presenta’l so recién discu “Ensin novedá” na SGAE y en Fnac

Dixebra presentó oficialmente’l so discu “Ensin novedá”(L’aguañaz, 2005)esti viernes 8 al meudía na sé uvieína de la SGAE, pela tarde la banda avilesina entamó otra presentación abierta al públicu y con presencia de los sos componentes nel Foru de Fnac. Acabante salir al mercáu, el nuevu álbum de la banda más veterana del rock n’asturianu nun ha defraudar a los sos incondicionales nin dexar indiferentes a los que tuvieran nel improbable casu d’escuchalos per primer vez.

Los trece temes que componen “Ensin novedá” falen de la realidá sobre la que Dixebra y los sos colaboradores habituales (nesti discu los cásique lletristes oficiales del grupu: Quique Faes y Xandru Fernández) llancen la so mirada crítica y certera, a menudu irónica y munches veces indignada: les negatives espectatives de futuru la mocedá asturiana, el duldosu papel de los axentes sociales por solventala, les inxusticies del mundu y hasta un tema dedicáu a los manteros, que nun paceía face-y muncha gracia a un Javier Vidal sentáu ente los medios informativos.

No musical, Dixebra siguen apostando polos sos calces espresivos avezaos: rock guitarreru, sones de reaggue y ská, fraseaos de rap, cola incorporación progresiva, talo veníen faciendo nes sos últimes mezcles, de programaciones y samplers, integraos nel discursu del discu col mesmu calter que les propies canciones.

“Ensin novedá” fai l’álbum númberu ochu de los grabaos por Dixebra y yera abondo esperáu dende la publicación en 2003 del so últimu trabayu: “Cróniques d’un pueblu” un discu recopilatoriu que se ufiertaba na mesma caxa que la biografía del grupu, col mesmu títulu, escrita pol periodista xixonés Francisco Álvarez.