Dixebra entama a grabar un nuevu discu

Dende’l martes d’esta selmana’l grupu Dixebra alcuéntrase grabando lo que va ser el so discu nuevu. El rexistru del trabayu discográficu númberu doce d’esta banda veterana nel panorama musical del país ta faciéndose nos estudios uviedinos Distrito Federal. Con Dani Sevillano como técnicu de soníu y la producción de Tana Díaz y Rubén Álvarez, los ocho componentes del grupu tán grabando y rematando d’arreglar quince temes bien distintos ente sí.

Como ye vezu nellos les pieces nueves toquen bien d’estilos de la música popular, asina nun van faltar canciones de calter punk, rock, reggae, ska, funk, folk, metal o rap. Guitarres dures y afilaes, base rítmica contundente, pero tamién momentos melódicos, ukelele, banjo, dobru, congues, acordión, sección de vientu completa (trompeta, saxu y trombón) o teclaos van tar presentes nesta grabación.

Temáticamente’l discu va movese alredor de l’actualidá asturiana y mundial, con testos qu’enllacen el pasáu col presente y referencies a la hestoria contemporánea d’Asturies; nesti sen, Dixebra quier ufiertar espacios pa la reflexón y la denuncia, con un tonu xeneral de llamada a l’acción. Pa la ocasión la mayoría de les lletres tán feches pol guitarrista Primi Abella, más otres creaes a comuña ente tola banda, ensin faltar les collaboraciones d’escritores como Quique Faes o Pablo Texón.

Nes próximes selmanes Dixebra va dar a conocer el títulu del discu, asina como los collaboradores, la fecha de salida y el conciertu especial de presentación.