Delegación del Gobiernu va reforzar esti añu la seguridá del Descensu Internacional del Sella

El delegáu del Gobiernu n’Asturies, Antonio Trevín anunció que’l dispositivu de seguridá preparáu pa la celebración el primer domingu d’agostu del Descensu Internacional del Sella va reforzase inda más esti añu. Tovía cola alcordanza de los artefactos colocaos pola banda terrorista ETA l’añu pasáu y nel mesmu día de la traxedia del metru de Londres -acabante ser escoyida sé olímpica-, los responsables de seguridá del Gobiernu nun quieren dexar nada al debalu nuna folixa que congraga a miles de persones cada veranu nes Arriondes y Ribesella.

Más de cuatrocientos axentes de la Guardia Civil, policía local, bomberos, unidaes del 112, van encargase de que la fiesta de Les Piragües trescurra con toa normalidá y tanto los aficionaos qu’acuden al eventu deportivu como los cientos de visitantes que se desplacen al Sella pa disfrutar d’una de les folixes más populares del país,puedan asistir tranquilos énte’l dispositivu entamáu pa garantizar la seguridá.

L’operativu estiéndese esti añu dende’l xueves 4 d’agostu al domingu 7 y ente otres midíes preventives ta pensao eliminar dalgunos puntos conflictivos, eliminando una parte de la zona de chiringuitos pa facilitar les víes llibres a cualquier evacuación d’emerxencia. Entrambos helicópteros, ún del Cuerpu Nacional de Policía y otru del CEISPA vixilarán dende l’aire pa que too se desenvuelva n’absoluta normalidá.