Portada Política Darréu reivindica la oficialidá

Darréu reivindica la oficialidá

by asturnet

Esti vienres 9 de Mayu, a les 19.30 na estación de RENFE d’Uviéu, tendrá llugar la yá rutinaria manifestación pola oficialidá de la llingua asturiana, entamada pola XDLA y dende Darréu, “un añu más y non por ello con menos fuercia”, llamaen al pueblu asturianu a salir a la cai pa lluchar polos nuesos drechos llingüísticos. De la mesma manera, llamen a la xente a participar nel bloque soberanista, yá presente na manifestación del 1 Mayu en Xixón, “entendiendo ésta como la meyor manera de defender los drechos de los asturianos: xunitariamente”.

Nun comunicáu asoleyáu esti día, Darréu quier dicir un añu más que “los asturfalantes vémonos sometíos al centralismu políticu del Estáu español qu’ente otres coses, ataca imparablemente a la nuesa llingua, queriendo imponenos una uniformación llingüística antidemocrática y aculturizaora. De la mesma manera, el conxuntu de los partíos que tienen representación na Xunta Xeneral, sigue dando-y la espalda a esti drechu básicu”. La nuesa llingua “vese día a día vetada nos medios de comunicación, na alministración ya inclusu na enseñanza, onde la represión llingüística y el menospreciu escontra l’asturianu van n’aumentu”.

Dende Darréu, la mocedá d’izquierda soberanista, esixen “la oficialidá del asturianu y’l consiguiente procesu de normalización llingüística nel nuesu país. Pa ello, llamamos al pueblu asturianu a movilizase non sólo pola nuesa llingua, sinon por una Asturies xusta y llibre”.

Tamién te podria gustar