Cultura sostién que 36 inversores privaos interésense nos proyectos al rodiu’l Muséu Xurásicu

Un total de 36 inversores privaos amosaron interés nes futures instalaciones que complementarán l’entornu del Muséu Xurásicu (MUXA) d’Asturies, allugáu na rasa costera de San Telmo, en Colunga. La conseyera de Cultura, Comunicación Social y Turismu, Ana Rosa Migoya, asoleyó güei esi datu pa defender énte la Comisión Parlamentaria d’esa estaya la viabilidá de los proyectos plantegaos al rodiu’l MUXA.

Ente eses futuribles actuaciones, figuren la construcción d’un parque temáticu de la mitoloxía asturiana, un hotel con balneariu y una estación turística, iniciatives propuestes pola empresa adxudicataria del proyectu de dinamizar el muséu, Advancec Leisure Services (ALS), y acoyíes a una cláusula de confidencialidá contenida nel contratu ente Cultura y esa sociedá.

Según sostuvo Migoya na so comparecencia énte la Comisión Parlamentaria de Cultura de la Xunta Xeneral, alcuéntrase abierta la captación d’inversores privaos p’amortizar el desembolsu públicu fechu nel equipamientu de Colunga, que se reveló como ún de los museos más visitaos d’Asturies poco depués de la so apertura al públicu, el pasáu 1 d’abril.

Los planes del Principáu pal Muséu del Xurásicu pasen por aprovechar el potencial d’atracción de turistes del centru pa dinamizar el sector terciariu de tol oriente asturianu, cola construcción de nuevos servicios y equipamientos col MUXA como epicentru.