Cultura convoca la primer xunta pa la escoyeta del Cancioneru Popular d’Avilés

El proyectu de Recuperación de Cantares Populares Avilesines, puestu en marcha pola conceyalía de Cultura y Promoción de Ciudá d’Avilés, echa a andar. Va Tener llugar esti sábadu, 20 de marzu, de 10 a 14 hores nel Conservatoriu Municipal Profesional Julián Orbón.

La meyora de les condiciones sanitaries dexa realizar la primer convocatoria presencial pa recuperar el rpatrimoniu musical avilesín. Un proyectu pal que se pide la collaboración ciudadana, y nel que van poder participar toes aquelles persones que conozan cantares tradicionales rellacionaes con Avilés, escuchaes en cualquier momentu de la so vida. Pa participar nesta primer sesión de grabación va ser necesario solicitar cita previa na Casa de Cultura, por aciu inscripción presencial na taquilla del centru, o al traviés del teléfonu 985 510 439.

Empobináu polos músicos Pablo Mores y Rubén Díez, a la so finalización espérase arrexuntar y catalogar ente 150 y 200 cantares, patrimoniu inmaterial de la ciudá calteníu pa les xeneraciones vinientes. Les grabaciones van ser realizaes en formatu d’alta calidá, y darréu transcritas, calteniendo la fidelidá al testimoniu oral, atendiendo a les variaciones de afinación, tonalidá, ritmu o compás que puedan debese a les llimitaciones interpretatives del informante y non a la naturaleza de la obres. Una vegada remataes les sesiones, van caltenese como material de consulta, y van protexese como un arquivu d’hestoria oral.

Tres esti procesu, va asocedese’l trabayu musicolóxicu. Van Acompañar a la trescripción de los cantares los comentarios de los informantes, dexando una meyor contextualización xeográfica ya histórica, como podríen ser les vinculaciones festives de cada cantar. Estos comentarios van ser reforzaos por entrevistes personales, que van dexar la profundización nos datos que los arquivos bibliográficos nun apurran, o lo faigan de forma llindada. La xera va concluyir col analís musical de caúna de los cantares recoyíos,  con cuenta d’atopar elementos comunes, patrones melódicos o estructures recurrentes.

La catalogación va dexar arrexuntar los cantares por xéneros, dómines, usos y autores, si los hai, y asitialos nel contestu de la sociedá, non solo avilesina o asturiana, sinón a un nivel mayor, ya inclusive establecer relaciones con otros conceyos o rexones.