Cristina Valdés ye la nueva Direutora d’Universidaes

Cristina Valdés, decana de Filosofía y Lletres dende 2010 y que fora reelexida l’añu pasáu, va ser la nueva directora xeneral d’Universidaes, dientru del cambiu de cares que se ta viendo nel ámbitu educativu nel Gobiernu del Principáu. Valdés ye profesora de filoloxía inglesa y direutora de la UABRA y tien una nomada sensibilidá pa coles cuestiones llingüístiques.

Tolos nomes conocíos hasta agora ente los nomamientos del nuevu Gobiernu pa Educación son nuevos respectu del anterior equipu, empezando pol mesmu conseyeru, Genaro Alonso, magar falten por nomar a los o les ocupantes de la viceconseyería de Cultura y Deporte y les dos direcciones xenerales que dependen d’ella nel organigrama.

Cristina Valdés foi reelexida en 2014 como decana de la Facultá de Filosofía y Lletres de la Universidá d’Uviéu en siendo la única profesora que presentó la so candidatura al cargu, qu’ocupaba dende había cuatro años. La filóloga, agora nomada direutora d’Universidaes, taba al frente del centru allugáu nel campus uvieín del Milán, unu de los mayores de la institución académica asturiana per númberu d’alumnos (ronda los 2.500), y diba facelo hasta finales de 2018.

Cristina Valdés ye profesora de Filoloxía Inglesa y llegó al decanatu tres el procesu de fusión de les antigües facultaes de Xeografía y Hestoria, Filoloxía y Filosofía, sostituyendo nel cargu a la presidenta de l’Academia de la Llingua Asturiana, de la que yera vicedecana, y a la que tamién sostituía hai poco como direutora de los cursos de veranu de la UABRA. Valdés ye académica de la Llingua Asturiana dende 2014.