Corvera organiza trés xornaes de cine n’asturianu

El Serviciu de Normalización Llingüística de Corvera entama unes xornaes del Audiovisual Asturianu que van entamar el miércoles 24 cola proyección de la webserie Chatarrona, d’Ámbitu Producciones. El xueves 25 van proyectase los curtiometraxes “Tres versiones”, “Bisarmes” y “L’aire del sur”. Dempués de la proyección alcuentru col director, Pablo Quiroga, y el vienres produciráse la proyección de la película McLintock, western dobláu al asturianu por Gonzali Producciones. Toles películes van ponese a les siete la tarde na Sala d’Arte del Centru Sociocultural de Les Vegues, con entrada de baldre.

Chatarrona

Chatarrona ye una comedia de situación de baxu presupuestu na que cuatro personaxes principales dan vida a situaciones cotidianes. Ye una ficción contemporánea que busca xenerar l’interés de los asturianos con independencia del sitiu de residencia y de la edá, pero que consiguió una incidencia especial, más de 25.000 visionaos, nes persones moces y de mediana edá con presencia nes redes sociales.

Tres versiones

Una película curtia del cineasta de Carreño Pablo A. Quiroga Prendes rodada ente los conceyos de Carreño y Gozón, ganó’l segundu “Certame de Vídeos en Llingua Asturiana de la Mancomunidá d’El Cabu Peñes”.

Bisarmes

Curtiopmetraxe de Francisco Martínez Peláez y Pablo A. Quiroga Prendes, con Txema Blasco, Marisa Vallejo, Fernando Marrot y Pelayo Prendes. Un curtiu filmáu en decoraos naturales nel conceyu de Carreño nel que se narra una hestoria de terror sobrenatural ambientada en dalgun llugar de l’Asturies rural.

L’aire del Sur

L’aire del sur, un cuentu d’Eva Braga Riera adaptáu por Pablo A. Quiroga Prendes y con música de Javi Suárez “Jahzzar”.

McLintock

George Washington McLintock (Jhon Wayne), ye un terrateniente d’Arizona con unos caducos principios basaos na rudez y el machismu, y que tarrez la llegada de colonos. Al empar, produzse la vuelta de la so muyer, Kate (Maureen O’Hara), que lu dexara por nun soportar les costumes del oeste y agora torna col enfotu de llevar a la so fía a un sitiu más civilizáu. A partir d’esi momentu, van asocedese les engarradielles ente dambos, lo que va provocar situaciones cómiques, agravaes pola contratación d’una nueva y guapa cocinera na facienda (Ivonne de Carlo).