Conceyu Abiertu por Llangréu llama a Festexos y al Ayuntamientu a “comprometese cola nuesa cultura”

Esti pasáu fin de selmana desendolcose en La Felguera una “Feria Andaluza” entamada pola Sociedá de Festexos “San Pedro” y que cuntó cola collaboración activa del Ayuntamientu de Llangréu y delles entidaes y empreses privaes escontra la que se manifiesta darréu Conceyu Abiertu por Llangréu por mor de la incoherencia cultural que presentara l’actividá.

Nuna nota de prensa asoleyada esta selmana, Conceyu abiertu diz que “l’eventu presentó un programa con munches actividaes que pretendíen averar a los llangreanos la realidá cultural d’Andalucia, al tiempu que trataba de dinamizar la zona de Llangréu Centru. Según los organizadores la feria foi un ésitu, anque la constante foi una irregular asistencia a la mesma, habiendo munches hores onde’l recintu tuvo cuasi vaciu. Dende Conceyu Abiertu por Llangréu yá refugamos nel so día esti tipu de cellebraciones, la última vegada en Sama esti mesmu añu”.

Les razones que lleven a la organización a refugar la cellebración d’esti tipu d’eventos flamenquistes en Llangréu son les que vienen darréu: – La utilización política ya ideolóxica de la cultura del Pueblu Andalú. Los poderes públicos lleven delles décades tratando d’afitar la cultura denomada “flamenca” o “andaluza” polos dellos países del Estáu Español col envís de manipular la cultura propia y crear una uniformidá na identidá de los pueblos artificial ya interesada. – La visión sesgada y simplaya que se da de la cultura ya identidá andaluza nestos eventos, lo que mos reafirma nel sen de que lo únicu que busquen cola promoción d’estes cellebraciones ye la sustitución de la identidá nacional asturiana por una identidá única, que representaría’l modelu cultural de la “nación española”. – L’arrequexamientu y progresivu desaniciu de la cultura, llingua ya identidá propia d’Asturies y Llangréu. Cada vuelta más les nueses señes propies queden relegaes a un segundu planu nes propuestes socioculturales que s’entamen nos conceyos del nuesu país. Un exemplu ye la decadencia na que sumieron a eventos como’l “Tolo d’Asturies” o la falta de drechos llingüísticos de les persones asturfalantes, munches vecines de nueso. – El más que posible espilfarru de perres públiques n’un eventu que nun revierte cuasi dineru nel nuesu conceyu. Pesie que dende la Sociedá de Festexos “San Pedro” falen d’ésitu al referise a la “Feria Andaluza”, son poques entidaes privaes les que van llevar los beneficios, si los hai. Amás, entendemos que la inversión pública del Ayuntamientu tien de destinase nestos momentos a otru tipos de coses, y nel casu de dir a ociu y cultura entendemos que podría apoyase a grupos musicales d’equí, actividaes venceyaes a la nuesa cultural, como amagüestos populares, etc. Asina, dende Conceyu Abiertu por Llangréu llamen a la Sociedá de Festexos “San Pedro” y al Ayuntamientu de Llangréu a “comprometese cola nuesa cultura y fuxir del flamenquismu, que nun supón más qu’aculturización pa Llangréu y Asturies. Tamién llamamos a la responsabilidá social d’estes entidaes, sabiendo percibir prioridaes n’un conceyu que cada vuelta más marxina la so cultura propia pero tamién el bientar de los sos vecinos”.