Portada Política Compromisu diz que la esclusión de Nava del Festival del Arcu Atlánticu avergoña a Xixón.

Compromisu diz que la esclusión de Nava del Festival del Arcu Atlánticu avergoña a Xixón.

by asturnet

El voceru nacional de Compromisu por Asturies, Daniel Fernández, treslladó’l refugu absolutu a la decisión de Foro d’escluyir a Nava del Festival del Arcu Atlánticu que se celebra en Xixón, como represalia a la espulsión de los conceyales de Foru del gobiernu navetu..

Compromisu por Asturies asegura que “utilizar la política cultural de Xixón como represalia contra otru Conceyu, nesti casu’l de Nava, por una tema políticu internu navetu como ye la espulsión de los conceyales de Foru del gobiernu, yá alza a surrealista la xestión de Rubiera en materia cultural, y amuesa el calter fondamente autoritariu y antidemocráticu de Foru que namá tien una máxima en política, o tas conmigo o tas contra mi”.

Pa Compromisu por Asturies “Rubiera nun tien derechu a convertir la ciudá nel ridículu permanente en materia cultural polos sos intereses partidistes” porque “Xixón acabará estudiándose en tol mundu como exemplu de lo que nunca tien de faese nesti ámbitu”.

Daniel Fernández quixo treslladar a “les nueses compañeres y compañeros de Asturianistes per Nava y al so Alcalde Emilio Ballesteros, el nuesu sofitu y tresmiti-y que Foru y Rubiera anguaño avergoñen a la ciudadanía, porque nun ye almitible que’l gobiernu municipal de Xixón utilice la política cultural, que tendría de ayudar a averar a los pueblos y les sos xentes, nun preséu d’enfrentamientu partidista” y aseguró que “por suerte en Nava nun se gobierna dende esa clave política, y sabemos que continuarán trabayando como capital de la sidra pa siguir siendo un referente na cultura y fomentar los llazos que nos xunen a tolos asturianos”, concluyó.

Tamién te podria gustar