Cinco obres opten al III Premiu d’Ensayu Emilio Trabanco

N’avientu finó’l plazu pa presentase al III Premiu d’Ensayu Emilio Trabanco Trabanco, esistiendo un total de 5 obres presentaes al mesmu. La participación nesta III Convocatoria “aseméyase enforma a les anteriores, con cinco obres, dos n’asturianu y trés en castellán”, espliquen dende la revista La Sidra. Sicasí, aclarien tamién que “da la impresión de que la calidá de les mesmes ye enforma mayor, a la espera de lo que valore’l xuráu”.

David Rivas sedrá’l presidente del xuráu que tendrá qu’escoyer ente les obre presentaes, y que tará compuestu por persones de reconocía rellevancia nel mundiu la sidra.

El Premiu d’Ensayu “Emilio Trabanco Trabanco” ye una iniciativa puesta en marcha pola revista La Sidra, espublización con dellos años d’esperiencia nel sector sidreru. Grupu Trabanco patrocina esti gallardón, col que se contribúi al estudiu y espardimientu de toos aquelles temes que definen la cultura de la sidra n’Asturies.

“La sidra y la mazana na pintura asturiana” foi la ganadora del ‘II Premiu de Ensayo Emilio Trabanco Trabanco, obra d’Arántzazu Ortiz , que pon de manifiestu la relevancia de sidra como motivu principal de más de 400 pintures y grabaos de distintes dómines. La Sidra editará ceo esti llibru.