Cerezal, Algaire, Tejedor y Silvia Quesada protagonicen la recta final de Lorient

La fin del selmana cola que se despide Lorient de la so edición de 2022 va tener a Cerezal, Algaire, Jose Manuel Tejedor y Silvia Quesada como protagonistes asturianos d’una programación que ya mira pala Irlanda invitada del añu entrante.

Esti vienres el grupu Algaire, que representa a Asturies nel concursu Loic Raison de grupos mozos del Festival, pasaba a la final que va desenvolvese dende les seis de la tarde nel espaciu Quai de Bretagne, donde pela nueche ufrirá un conciertu completu’l grupu ganador. Algaire compite nesta final con otros tres grupos bretones, que van pone-ylo enforma difícil, pero aportar hasta equí ye un bon resultáu nun concursu enforma conpetitivu y difícil.

Ye una de les exes de la presencia asturiana na recta final del Festival de Lorient que va tener tamién a José Manuel Tejedor y Silvia Quesada como invitaos espciales na Celtic Odyssée de Ronan Le Bars que va poder vese nel Teatru de la villa lorientesa y el conciertu que Cerezal va ufrir nel Kleub a les dos y media la tardi.

Depués, la nueche d’Irlanda en L’Amphi y les actuaciones na carpa asturiana d’Urso Dakoff y Baxel van poner fin a la presencia de la Delegación Asturiana, que recueye los materiales y entamará viaxe de vuelta’l domingu enantes mesmo de que se pieslle’l Festival pela tarde.