Celestino Rozada estrénase na grabación de discos con ‘Cantares dende la mayada’

L’Asociación Cultural Llacín, de Porrúa, y el sellu Ámbitu-L’Aguañaz tán acabante d’espubliza el primer discu del cantante de tonada Celestino Rozada Tamés, ‘Cantares dende la mayada’, un discu con catorce temes del repertoriu tradicional ente los que s’inclúin ‘La cabraliega’, ‘Baxaron cuatro ayeranos’ o ‘Soi pastor’.

L’autor, ñacíu en Porrúa en 1972, ye, como munchos de los cantantes de tonada, de formación autodidacta y entama de bien mozu a dase a conocer pelos concursos d’Asturies con más sonadía. Más tarde pasó un tiempu nel estranxeru y el gran ésitu diba vení-y dempués, nel añu 2006, al proclamase campeón del Certame de Tonada del conceyu d’Amieva.

Yá ta nes tiendes esti primer discu de Rozada, con cantares tan prestosos como ‘Hai una llinia trazada’ y ‘La carretera’l Pedrosu’. Dos razones más pa escuchar esti nuevu trabayu.