El sábadu termina’l plazu pa presentar candidatures al Premiu Timón 2007

Queden pocos díes pa presentar candidatures al ‘Premiu Timón’, que l’Asociación de la conocida como ‘vagamar lliteraria en Xixón’ convoca “col envís de facer reconocencia de la trayectoria lliteraria y/o’l llabor de promoción de la lliteratura asturiana”. Miembros de l’Asociación declararon “que yá se recibieron delles propuestes mui interesantes” pero la presentación de candidatures ta abierta hasta’l próximu sábadu, 1 de setiembre y nun ta nada decidío.

El Premiu quier sirvir de reconocencia a trayectories bien llarges y por ello, pa esta edición de 2007, “opten al premiu los/es escritores n’asturianu que ñacieren nel añu 1957 o anteriormente”. Pal fallu del premiu la Xunta Direutiva de l’Asociación Cultural l’Arribada va aconceyar un xuráu integráu por persones venceyaes a la cultura del país.

Según indiquen les bases de la convocatoria, les candidatures van poder ser presentaes por una persona un coleutivu a les señes de corréu lletrónicu que siguen: arribada_sectec@yahoo.es

El galardón va entregase en Xixón demientres la celebración de l’ARRIBADA 2007, que ta pesllando yá la programación d’esti añu, nel que va pasar de seis a nueve díes de celebración.