Barbón considera la FP una exa estratéxica pal futuru y pa crear emplegu

El Principáu va entornase esta llexislatura n’amontar y ameyorar la Formación Profesional (FP) que s’imparte na comunidá. El Gobiernu autonómicu considera esti ciclu educativu una exa estratéxica pal futuru d’Asturies y un recursu fundamental pa fomentar l’emplegu.

Asina lo aseguró’l presidente Adrián Barbón esta selmana pasada mientres l’apertura oficial del cursu nesti ciclu educativu, actu que tuvo llugar nel Centru Integráu de Formación Profesional (CIFP) de Cerdeño, en Cualloto (Uviéu).

El presidente del Principáu manifestó que la so presencia nesi centru, «la xoya de la corona del FP nel Principáu», ponía de manifiestu la necesidá de «poner en valor una Formación Profesional de primera calidá, fundamental pal futuru». Barbón, acompañáu de la conseyera d’Educación, Carmen Suárez, anunció qu’una de les prioridaes del so Executivu va ser actualizar la ufierta formativa de la FP p’afaela a les necesidaes del mercáu llaboral actual». Según el presidente, apura que les titulaciones de les enseñances profesionales respuendan a «la realidá y les demandes de les empreses», nun mercáu llaboral qu’anguaño «nun tien nada que ver col de los años 70 o 80», añedió.

Según Barbón, apostar pola formación ye unu de los pocos recursos de los que dispon un Gobiernu pa «abrir nuevos nichos d’emplegu». Nesti sentíu, destacó l’oxetivu d’avanzar nel desenvolvimientu de la FP Dual, «el gran retu que tien Asturies, nel que se dieron pasos qu’a les clares son insuficientes». Barbón aportunó en poner en valor una formación «que nun ye menor», sinón que resulta «estratéxica pa munches persones a les que dexa desenvolver l’actividá profesional en condiciones calidable y qu’acaldía se venceya más a la realidá llaboral».

Esti cursu entama cola incorporación d’un nuevu grau cimeru na ufierta formativa del Principáu. En concretu, el IES de Lluces (Colunga) va impartir en modalidá presencial el nuevu ciclu cimeru de Ganadería y Asistencia en Sanidá Animal. Enagora, Educación nun dispon de datos -«yá que nun se cerró la matrícula», indicó’l presidente-, pero vistu la medría de les preinscripciones, espérase superar la cifra de 15.421 estudiantes del cursu pasáu en FP.