asturnet

Conceyu Abiertu por Noreña quier espresar la so alegría pola declaración de la sidra bébora oficial del Conceyu, dao que foi una propuesta consensuada ente los distintos grupos que les teníamos presentaes (PP y Conceyu Abiertu) xunto cola propuesta del Gobiernu Municipal (PSOE-IDEAS), foi aprobada por unanimidá y pudo ser redactada y presentada de forma billingüe, n’asturianu y castellanu, fechu ésti que, si bien debería ser dalgo normal, nel Conceyu de Noreña cuasique pue considerase como más sospriendente y noticiable que’l propiu fechu d’aprobar la declaración.

P’acceder a que toviere tamién escrita n’asturianu, pidieron que la versión asturiana fore d’un Serviciu de Normalización Llingüística pidiéndo-y collaboración pa ello al de Siero. Too ello, col resultáu final de la presentación y aprobación de la declaración nos dos idiomes, siendo’l primer “xestu” del gobiernu del PSOE nesta llínia. Hai que remembrar que se nos vien torgando durante tola llexislatura presentar mociones n’asturianu y que los derechos llingüísticos de tola población nun tan garantizaos en Noreña.

Ello asina, a Conceyu paez-yos un pasu importante’l que se comprienda la íntima rellación esistente ente llingua asturiana y la cultura la sidra que formen parte d’un tou que pue nomase cultura asturiana y tamién mos paez bien que s’aproveche como argumentu de reafirmación del fechu diferencial y de les peculiaridaes que caltién la cultura asturiana de la sidra. Agora bien, el nuesu enfotu ye, y siguirá siendo, “facer comprender que’l compromisu cola normalización y cola promoción del asturianu nel Conceyu de Noreña nun seya namás ocasional o testimonial, en díes especiales… Nós, entendemos que la promoción y normalización ye dalgo que debe y pue incorporase al día a día, a lo cotidiano y que son oxetivos que se puen trabayar tresversalmente a toles demás custiones, y la clave vese que ye tener voluntá político”.

L’Asociación N’AST vieno acabante d’asoleyar un comunicáu nel que fala de “delles agresiones al asturianu que ponen bien a les clares la situación d’anormalidá democrática que tamos viviendo n’Asturies, derivada de la falta d’oficialidá de la llingua asturiana, y la necesidá de la mesma –la oficialidᖠque torgue estes situaciones y qu’ampare los drechos llingüísticos del pueblu asturianu”.

Nun comunicáu asoleyáu esti mesmu martes, N’Ast fai alcordanza del polémicu –y mediáticu– casu de les multes de Mieres, la selmana pasada nel que “los asturianos y les asturianes tuvimos qu’aguantar nuevos ataques a los nuesos drechos llingüísticos, ello ye, nueves agresiones a la llingua asturiana”.

Amás, el comunicáu recueye’l casu del direutor del Festival Internacional de Cine de Xixón (FICX), Nacho Carballo, que decidió camudar el nome de la seición “Llendes” pol so equivalente n’español, “Límites”, cola xustificación de que nun yera “por cuestiones lingüísticas”, sinón porque “en Europa se entiende mejor Límites que Llendes”. Al ser entrugáu pol tema, el Conceyal de Cultura, Carlos Rubiera Tuya, vieno a dicir que naide podía duldar de la so trayeutoria como defensor de la cultura asturiana, y dende N’AST nun lo faen: “namás que mos remitimos a los fechos: la yá probetaya –por nun dicir nula– presencia del asturianu nel FICX vese tovía más amenorgada. Sicasí, dende N’AST queremos echa-y un gabitu a los responsables del FICX apurriéndo-yos la idega que bien darréu: si de verdá quieren que se mos entienda meyor n’Europa, meyor camudar los nomes de toles estayes del certame y ponelos n’inglés, alemán o esperantu…”

D’otra miente, el pasáu día 8 la Conseyería d’Educación, Cultura y Deporte, al traviés de la Direción Xeneral de Política Llingüística, entamó’l “Día de les Ciencies Asturianes”, un día nel que, supuestamente, se diba emplegar l’asturianu como llingua vehicular d’una charra que llevaba por títulu “Les aventures moleculares de la vida”. De fechu, aconceyaren a 1.200 escolinos de l’asignatura d’asturianu nel Teatru de La Llaboral que quedaren ablucaos cuandu’l conferenciante, el científicu Carlos López Otín, dio la charra ¡n’español!.

Esti últimu fechu podemos entendelu, que’l señor López Otín nun seya asturfalante porque ye aragonés, pero non el ridículu que fizo la Conseyería. Poro, dende N’AST “permitímonos tamién aconseyar que si quier facer un día de les ciencias n’asturianu lo primero que se tien d’asegurar ye que’l ponente fale n’asturianu. Una tomadura de pelo más, col asturianu como protagonista, y otra amuesa del procuru que’l Gobiernu d’Asturies tien pa cola nuestra llingua”.

En resume, sigún N’AST “tamos acabantes d’asistir a delles agresiones al asturianu que ponen bien a les clares la situación d’anormalidá democrática que tamos viviendo n’Asturies, derivada de la falta d’oficialidá de la llingua asturiana, y la necesidá de la mesma –la oficialidᖠque torgue estes situaciones y qu’ampare los drechos llingüísticos del pueblu asturianu”.