Entamen con ésitu los talleres de llectura en Samartín del Rei Aurelio

Esti vienres pela tarde na Casa de la Xuventú de Sotrondio celebróse la primera sesión d’unu de los talleres de llectura entamaos pola Oficina de Normalización Llingüística del conceyu en collaboración cola asociación cultural Bocina Nalón y la Oficina d’Información Xuvenil. Nesti taller un grupu de 13 neños,-es ente 7 y 10 años lleeron, xugaron y ficieron actividaes rellacionaes col llibru “Tapín de Picupáu” de Pablo Rodríguez Medina. Nesta primera sesión comentáronse-yos delles cuestiones rellacionaes col conteníu del llibru, col so argumentu y pallabreru.

Amás, convirtiéronse en periodistes, siendo ellos mesmos los que prepararon les entrugues que-y van facer al autor na siguiente sesión. Tamién pintaron y participaron nun xuegu rellacionáu con una esposición sobre los escritores del conceyu de Samartín, lo que-yos permitió conocelos un poco más. Lo que se pretende con estos talleres ye atrayer a les xeneraciones más moces al mundu de la llectura fuera del horariu escolar, dando-y asina un enfoque lúdicu y d’entretenimientu.

Esta actividá ye una de les principales novedaes que presenten les Xornaes de Lliteratura Infantil y Xuvenil d’esti añu, y que se suma a les esposiciones y les representaciones teatrales que se tán celebrando nel conceyu a lo llargo del tol mes.