13000 escolinos van beneficiase de la Selmana de la Ciencia

Más de 13.000 escolares asturianos van tomar parte en dalguna de les actividaes de la XII Selmana de la Ciencia y la Tecnoloxía de la Universidá, qu’empieza güei llunes, 11 de noviembre, y va enllargase hasta’l próximu vienres. Qué ye’l bosón de Higgs, cuálos son les evidencies del cambéu climáticu, qué secretos puede desvelar l’ADN o les razones poles qu’Albert Einstein camudó la hestoria son dalgunes de les cuestiones a les qu’alumnos y profesores de centros educativos de toa Asturies van poder atopar respuesta nos talleres, conferencies y esposiciones entamaos a lo llargo de tola selmana.

El rector de la Universidá d’Uviéu, Vicente Gotor, y la directora xeneral de Formación Profesional, Desenvolvimientu Curricular ya Innovación Educativa del Principáu d’Asturies, Sara Álvarez Morán, inauguraron oficialmente esta mañana la décimu tercer edición de la Selmana de la Ciencia, que cunta col respaldu de la Conseyería d’Educación, Cultura y Deporte y la Fundación Española pa la Ciencia y la Tecnoloxía (FECYT).

A lo llargo d’esta selmana casi 3.000 alumnos de secundaria van pasar poles instalaciones de la Universidá d’Uviéu pa participar en dalgún de los talleres y conferencies entamaes. Per otru llau, 40 investigadores de la Universidá d’Uviéu van percorrer centros educativos de tola rexón pa ufiertar a los alumnos charres divulgatives sobre les sos área de conocencia. Les conferencies del Día de la ciencia nel mio colexu van llegar a casi 10.300 alumnos del Principáu.

La Unidá de Cultura Científica de la Universidá d’Uviéu, col auspiciu del Vicerrectorado d’Investigación y Campus d’Excelencia Internacional, ellaboró un programa multidisciplinar pa espublizar el trabayu de el investigadores y averar los sos afayos a los mozos de manera práctica y amena. Les actividaes de Ciencia apasionante inclúin 38 itinerarios distintos nos que los alumnos de secundaria y bachiller van visitar les instalaciones de los Servicios Científicu Técnicos de la Universidá.