asturnet

La 51ª. edición del Festival Internacional de Cine de Xixón (FICX) suma nueves cares conocíes pa una gala d’inauguración con mayor relieve, na que va tar José María Sanz, más conocíu por Loquillo, pa sumase estyi vienres 15 al homenaxe qu’esi día va recibir l’actor Carmelo Gómez, a quien se-y va apurrir el premiu Nachu Martínez” en reconocencia non yá a so consistente y premida trayectoria como intérprete, sinón tamién a la so disposición pa collaborar con realizadores nuevos.

La del vienres, va Ser una gala con muncha presencia de cineastes, hasta una cincuentena, que quieren acompañar y homenaxear a dos de los profesionales más carismáticos del cine español: Vicente Aranda, que va recibir el premiu d’homenaxe del FICX a toa una carrera, y la montadora Carmen Fríes, a quien se-y concede’l premiu de l’asociación “Muyer de Cine”. El premiu a Carmelo Gómez va apurrilu’l cineasta y escritor asturianu Gonzalo Suárez, que dirixió al actor en “El porteru”, pero tamien anunciaron la so presencia nel teatru Xovellanos directores de como Fernando Trueba, Jaime Chávarri o Fernando Méndez-Leite.

Nun duru comunicáu asoleyáu esti día, la Xunta pola Defensa de la Llingua Asturiana califica de “cosmopaletu” a Nacho Carballo, director del Destival de Cine de Xixón y critica les desafortunaes declaraciones “pasotas” del conceyal de Cutlura, Carlos Rubiera, d’un llargu historial de compromisu cola llingua y la cultura d’Asturies.

El Festival Internacional de Cine de Xixón (FICXixón) acaba de camudar el nome de dos de los sos ciclos más importantes. Asina, Esbilla conviértese en Gran Angular y Llendes pasa a ser Límites. Y pa la Xunta pola Defensa de la Llingua Asturiana (XDLA) “trátase d’un fechu llamentable al ser una castellanización que supón un pasu atrás grave na visibilización del nuestru idioma. La XDLA considera una muestra de “cosmopalestismu” la xustificación del cambiu: según Nacho Carballo, director del certame, fuera d’Asturies naide sabe lo que significa llendes, pero sí límites. Hai que tener en cuenta que FICXixón ye ún de los festivales de más prestixu nel ámbitu del cine independiente internacional y l’usu del asturianu nestos detalles yá taba aceptáu como dalgo normal ensin qu’en nengún momentu supunxere dalgún problema”.

Mesmamente, recuerda la XDLA “hai unos meses, una auditoría sobre’l turismu en Xixón señaló como dalgo positivo y digno de meyora la valoración del patrimoniu cultural al traviés del usu del asturianu nesi ámbitu. Sicasí, Carballo da un pasu atrás y quita les referencies asturianes del eventu con más repercusión mediática de la ciudá. Y ye que los sos argumentos caen con un solu exemplu: el Festival de Cine de San Sebastián –o Zinemaldia- tien secciones con nomes como Zabaltegi, lo que nun quita pa que’l certame sía’l más importante de tol Estáu y ún de los más prestixosos del ámbitu européu –amás d’un de los eventos culturales más importantes d’España-“.

A la XDLA choca-y tovía más “l’actitú del conceyal de Cultura, Carlos Rubiera, que siempre repite que ye un defensor del asturianu: nun sé pue entender cómo un representante públicu pue dicir eso mentes permite que se dea un pasu atrás na visibilidá del nuestru patrimoniu llingüísticu. Patrimoniu que, amás, ta amparáu y protexíu pola llei y que les alministraciones tienen que potenciar y visibilizar. Pa la XDLA, les palabres de Rubiera muestren el so pasotismu na defensa de los derechos llingüísticos de tolos asturianos, una defensa qu’hai que demostrar con fechos y non con palabres”. Por eso, la organización solicita al Festival Internacional de Cine de Xixón que “restituya la denominación de siempre de les secciones. Amás, reclama al responsable de Cultura xixonés coherencia ente les palabres y los fechos”.