asturnet

Nun comunicáu asoleyáu na mañana d’esti vienres, La Xunta pola Defensa de la Llingua denuncia la persecución de la llingua asturiana en Mieres nestos díes nos que “tamos asistiendo al espectáculu llamentable que tán dando, primero la Policia Local al multar a ciudadanos por nun dar por válidu un permisu d’aparcamientu pa la Casa de Cultura redactáu n’asturianu, y depués del Conceyu de Mieres al decidir solucionalo quitando l’asturianu d’eses autorizaciones”.

La Xunta pola Defensa de la Llingua Asturiana (XDLA) quier denunciar públicamente esta escalada nel absurdu total y, como consecuencia, na persecución de los derechos de la ciudadanía. Naide con dos deos de frente pue pensar que se trate d’un problema d’entender o non l’autorización porque tea redactada n’asturianu. El problema ye que servidores públicos niéguense a aceptar como normal la llingua qu’usa la población de Mieres a la que sirven.

Cola sida de que l’asturianu nun ye oficial, pala XDLA “ponen per delantre eses comenencies llegalistes antes que ser tolerantes y tener bona voluntá. ¿Nun entienden l’autorización o nun la quieren entender? ¿Son illegales agora tolos ciudadanos de Mieres y van quedar nuna situación d’inseguranza y desprotección xurídica? ¿Multarán a los ciudadanos que falen cola policía local por nun los entender?”.

La XDLA diz plasmase “ante los niveles d’intolerancia llingüística que tenemos que sufrir n’Asturies. Y lo que ye tovía más intolerable ye ver cómo un gobiernu municipal democráticu, encabezáu por un partíu que defende la oficialidá y los derechos plenos pa los falantes d’asturianu, dobla de manera tan vergonzosa cuando daquién acusa d’illegal l’usu del nuestru idioma. Lo que tien tola traza de ser un problema personal col responsable de la Casa de Cultura de Mieres tán amazcarándolo con lleis y reglamentos, y el resultáu ye que l’usu normal de la llingua asturiana nun permisu d’aparcamientu acaba eliminándose por orde del señor alcalde”.

La XDLA esixe la intervención inmediata de los responsables pa reestablecer la normalidá nesti absurdu y frenar l’alarma social xenerada énte la indefensión en gran parte de la población que se sabe custodiada por unes “fuerces de seguridᔠque nun los entienden o nun los quieren entender, y por un equipu de gobiernu que lo almite y que, coles sos decisiones, apóyalo.

El voceru nacional de Compromisu por Asturies, Daniel Fernández, esixó que’l Conceyu de Mieres restableza los derechos de los asturfalantes en Mieres, una y bones la llegalidá garantiza l’usu del asturianu en tolos niveles alministrativos, y nun retire les autorizaciones d’aparcamientu municipales escrites en asturianu.

Compromisu por Asturies considerada “fondamente llamentable que’l gobiernu municipal de Mieres d’Izquierda Xunida, nes sos guerres internes cola Policía Local, nun defenda los derechos de los asturfalantes, dando validez a argumentos caprichosos, autoritarios y totalmente fuera de la llegalidá”.

Pa Compromisu por Asturies “nin siquier sería necesariu allegar a la Llei d’Usu p’asegurar que l’actuación de la Policía Local de Mieres ye totalmente irregular, al sancionar a un vehículu por aparcar nun llugar pal que cuntaba autorización municipal porque esta taba escrita n’asturianu, cuidando que l’Alministración Pública tien la obligación de faer prevalecer cualesquier derechu sobre la forma en que s’exerza” y “les pallabres distintes en castellán y asturianu nesa autorización que se consideró non válida, yeren perfectamente comprensibles hasta para un axente que nun sabe escribir en castellán, como ye’l casu” cuidao que “d’aparcamientu a aparcamientu poca o nenguna dificultá hai de comprensión”.

Daniel Fernández quixo treslladar “la so oposición y crítica atayante a l’actitú de la Policía Local de Mieres y del Sindicatu Independiente Policía Local d’Asturies (SIPLA), porque si tienen conflictos col Conceyu de Mieres estos nun pueden traducise en llindar derechos a otros colectivos, nesti casu a los asturfalantes” y tomar una posición “a favor d’un axente que realizó una actuación caprichosa, arbitraria, autoritaria y que desprecia a munches asturianes y asturianos, ye directamente ponese en contra de la sociedá civil pa defender los sos intereses corporativistes” y añedió que “les sos argumentaciones pa defender tal actuación ignoren intencionadamente la Llei de Usu y los principios básicos de l’actuación de les Alministraciones Públiques, y el so primer llabor como Policía ye defender los derechos de la ciudadanía, non los suyos propios” porque “la llegalidá garantiza l’usu del asturianu en toles alministraciones, gúste-y o non al SIPLA o a la Policía Local de Mieres”.

Dende Compromisu por Asturies aseguren que mientres non se declaré la oficialidá del asturianu, los asturfalantes vamos ser secillamente ciudadanos de segunda, que vamos sufrir represalies por usar el nuesu idioma hasta de persones que nun saben utilizar el castellán correchamente y que lu defende con tanto celu” concluyó’l voceru nacional.

Pa l’Asociación Cultural N’AST, casos como l’asocedíu va un par de díes en Mieres, onde la Policía Llocal multó a los propietarios de dos vehículos que cuntaben con tarxetes autorizaes d’aparcamientu, pero qu’al tar redautaes n’asturianu facíenles “incomprensibles” pa los axentes del orde, ponen bien a les clares la situación d’anormalidá democrática que tamos viviendo n’Asturies derivada de la falta d’oficialidá de la llingua asturiana.

Por desgracia, situaciones tan esperpéntiques como l’asocedía nel conceyu mineru son bastante más habituales de lo que pueda paecer, por eso dende N’AST perafitámonos na nuesa reivindicación d’oficialidá pal asturianu, una oficialidá que torgue estes situaciones y qu’ampare los drechos llingüísticos del pueblu asturianu.

Amás, nesti casu concretu de Mieres, N’AST camienta que l’argumentación de que les tarxetes autorizaes d’aparcamientu resultaben incomprensibles arreciende abondo a represión pura y dura, más qu’a un problema d’entendimientu real. Poro, queremos pidir públicamente al Ayuntamientu Mieres que xixile esti tipu d’actitudes de la Policia Llocal, qu’ensin dulda constitúin un nidiu exemplu d’estrallimitación nes sos funciones.

De la mesma manera, encamentámos-y a Izquierda Xunida, fuercia política que gobierna nel Conceyu y que supuestamente ta a favor tanto de la oficialidá del asturianu como de la so normalización social, que, a falta d’oficialidá n’Asturies, dote al Ayuntamientu Mieres d’unes Ordenances Municipales d’Oficialidá de la Llingua Asturiana que regulen y amparen l’usu del asturianu, y coles que s’eviten situaciones tan ridícules como la de les famoses multes.

L’abusu manifiestu d’un policía de Mieres que multó a un trabayador de la Casa la Cultura de Mieres por “nun entender” la frase n’asturianu “Autorización Aparcamientu” traxo ayeri a l¡actualidá otra vuelta la necesida d’un marcu llegal d’oficialid’a qu’acabe con abusos d’esti tipu de marxinación inaceptable qu’entá sufren los falantes d’asturianu nel so país. Partíos y asociaciones entamaron esti viernes a manifestar la son indignación dafechu y a reclamar darréu la “oficialidá” de la llingua asturiana.

La multa provocó la quexa de la Casa Cultura de Mieres que vien d’unviar un escritu Aníbal Vázquez, alcalde del conceyu, por mor d’esti casu de represión llingüística sufrida por un conductor, a causa d’un supuestu “aparcamientu indebíu”. La realidá de los fechos foi que’l vehículu, aparcáu nuna zona acutada énte la Casa Cultura, tenía nel salpicaderu una autorización escrita n’asturianu y que l’axente dixo “nun entender”, polo que decidió poner una multa d’ochenta euros, repitiendo esa mesma multa a otru conductor depués.

Ismael González Arias, responsable de la Casa Cultura Teodoro Cuesta de Mieres, treslladó a la Casa Conceyu’l so maltar pola situación con un escritu irónicu nel que s’ufierta “a dar clases de bable a los policíes”, asina como en castellán, pola esistencia de faltes d’ortografía na multa.

Asociaciones y Partíos políticos refuguen el casu

A lo lllargo de la mañana vienen asoleyándose abondes notes de prensa criticando la midía por parte d’asociaciones y partíos políticos, dende Andecha y Compromisu a N’Ast, esperando que sigan apaeciendo a lo llargo del día manifestaciones nel mesmu sen.

Pa l’Asociación Cultural N’AST, casos como l’asocedíu va un par de díes en Mieres ponen bien a les clares la situación d’anormalidá democrática que tamos viviendo n’Asturies derivada de la falta d’oficialidá de la llingua asturiana.

Por desgracia, situaciones tan esperpéntiques como l’asocedía nel conceyu mineru son, según l’asociación, “bastante más habituales de lo que pueda paecer, por eso dende N’AST perafitámonos na nuesa reivindicación d’oficialidá pal asturianu, una oficialidá que torgue estes situaciones y qu’ampare los drechos llingüísticos del pueblu asturianu”.

El Conceyu de Castrillón vieno acabante de poner en funcionamientu un Serviciu de Normalización Llingüística del asturianu, una oficina abierta a la ciudadanía que tien por oxetu’l fomentu del idioma na institución municipal y ente la vecindá castrillonense. Trátase, polo tanto, d’un serviciu pa tolos ciudadanos y toles ciudadanes, creáu pa contribuir al desenvolvimientu del idioma, esto ye, fomentar l’usu del asturianu en tolos ámbitos de la vida municipal en condiciones de normalidá, ameyorar el conocimientu y les actitúes sobre la llingua asturiana, y enanchar la so presencia na vida social y cultural del Conceyu de Castrillón.

Esti Serviciu, estrenáu’l pasáu 4 de payares, ponse en marcha col envís d’executar el Proyectu de Normalización Llingüística del Ayuntamientu de Castrillón 2013, aprobáu por Resolución d’Alcadía’l 10 de setiembre del 2013, y que consiste, grosso modo, na traducción al asturianu de les publicaciones, folletos, guíes, documentos, impresos, etc. que xenere’l Conceyu hasta’l 31 d’avientu del 2013, arriendes de la traducción de la páxina web del Centru Cultural Valey.

Amás de les funciones enconmendaes por Alcadía, esti Serviciu tien tamién ente les sos funciones la d’asesoramientu, información y ayuda a particulares, empreses, asociaciones y entidaes de toa triba del Conceyu de Castrillón, en cuantes a la llingua asturiana se refier. Tamién ye función d’esti Serviciu’l fomentu del usu de la toponimia oficial del Conceyu, aprobada por Decretu en xunu del 2008.

La persona responsable d’esti Serviciu accedió a la plaza pente medies d’un concursu-oposición al que concurrieron un total d’once persones. La Técnica Sociollingüística ye llicenciada en Filoloxía y Especialista en Llingua Asturiana. La sede del Serviciu de Normalización Llingüística de Castrillón, dependiente de la Conceyalía d’Educación y Cultura, ta instalada na segunda planta del Centru Cultural Valey de Piedrasblancas y tien un horariu de 8 a 15:30h, de llunes a vienres. Les persones interesaes puen ponese en contactu presencialmente ente les 10 y les 15:30h, al traviés del corréu electrónicu: llucia.menendez@ayto-castrillon.es, o per teléfonu: 985530329.

L’Academia de la Llingua Asturiana pieslla güei, na Facultá de Filosofía y Lletres de la Universidá d’Uviéu, les XXXII Xornaes Internacionales d’Estudiu , que vienen desendolcándose dende’l martes y qu’ayeri tuvieron un bon programa d’aportaciones con comunicaciones de calter mayoritariamente históricu y lliterariu, de la mano de la poesía recién, por parte de Xosé Bolado y alrodiu tamién de la figura de Pín de Pría, con un sentíu recuerdu a Miguel Ramos Corrada.

Nesta segunda xornada del miércoles 7, qu’entamó a les cuatro la tarde, pudo sentise la ponencia “Al ritmu de los díes de la vida propia: Una mirada circunstancial sobre poesía nueva” de Xosé Bolado, y, depués del alderique, cuatro comunicaciones a partir de les cinco la tarde: “El modernismu na lliteratura asturiana”, de Xosé Ramón Iglesias Cueva; “Había un conde n’Asturies_ asturianos na lliteratura baxomedieval francesa”, de David Guiardado; “Los pecheros asturioanos a fines de la Edad Media” d’Andres Martínez Vega y “Cuadernu de Notes d’un notariu de San Pedru de Teberga”, de Raquel cuétara. Como dempués de cada bloque de ponencies, un alderique y posa.

A les 18:15 tornaron les ponencies con “Determín de comportamientos xeneracionales nel Surdimientu”, de Xuan Santori; “La torna de la obra poética d’Ausiàs March al asturianu”, de Pablo Suárez García; y “Les llechares: una aproximación a la primera poética de Rubén d’Areñes”, de Pablo Rodríguez Medina.

A les siete y cuartu hubo un nuevu alderique y darréu d’elli la ponencia “Pepín de Pría y sus apostillas al Vocabulario de Rato y hevia” de Beatriz Hernán-Gómez Prieto de la Universitá degli Studi de Milán.

Les sesiones d’esta tarde, cabera de les Xornaes, entamen cola ponencia «La especificidad del asturiano vista a través del DÉRom (Dictionarie Étymologique Roman)» de la profesora Myriam Benarroch (ATILF/CNRS & Universidá de París – La Sorbonne). Darréu la sesión continuará cola llectura de les comunicaciones del miembru d’esta Académicu Xosé Lluis García Arias, siguíu de los profesores Xulio Llaneza Fernández, Xuan Xosé Lajo y Clara E. Prieto Entrialgo.

Les Xornaes finarán coles ponencies de la profesora Anne-Marie Chabrolle-Cerretini (ATILF/CNRS & Universidá de Lorraine) «La lengua asturiana en los textos lingüísticos y diccionarios francófonos» y del Académicu d’Honor de l’ALLA Michael Metzeltin (Universidá de Viena) titualada «L’asturianu ente les llingües romániques».

Per cuartu añu consecutivu, la Fundación Nuberu y l’Ayuntamientu de Llangréu organicen les xornaes culturales De Castilletes y carbón. Trátase de la edición cuarta d’una actividá de dinamización cultural qu’estes dos entidaes ponen en marcha como consecuencia del conveniu de collaboración firmáu ente elles.

Estes xornaes culturales xiren alredor de les interrellaciones ente cine, mina, música, lliteratura, economía, gastronomía… y s’articulen nun ciclu de películes, Baxando a la Galería, una serie de ponencies sobre estos temes, Los Xueves de Castilletes y Carbón, y un conciertu del grupu Nuberu’l día de Santa Bárbara. Dempués de rematar esti mes d’ochobre’l ciclu cine Baxando pa la galería, les xornaes culturales De castilletes y carbón siguen col programa charres Los xueves de castilletes y carbón que van desenvolvese tolos xueves d’esti mes de payares na Casa los Alberti de Ciañu. Esti ciclu ábrese esti xueves 7 a les 20:00 hores con D. Luis Felipe Capellín que va lleer la ponencia Tiempu de fugaos. Los xueves de castilletes y carbón van siguir coles intervenciones d’Adrián Barbón Rodríguez, Xosé Antón González Riaño, Chechu García y Pablo Rodríguez Medina. L’actividá de De castilletes y carbón remata’l 4 d’avientu, día de Sta Bárbara con un conciertu del grupu Nuberu na Casa la Cultura de La Pola Llaviana.