Nuevu casu de represión Llingüística na Universidá d’Uviéu

El Conceyu Universitariu pol Asturianu (CUPA) tuvo conocimientu d’un nuevu casu de represión llingüística na Universidá d’Uviéu. Un alumnu de la Facultá de Formación del Profesoráu y Educación recibió una llamada de la Secretaría de la entidá, na qu’una de les trabayadores d’esta unidá lu amenzaba de forma maleducada y a voces por presentar un documentu n’asturianu, esixéndo-y que nun presentara “nunca más” nengún documentu nesta llingua, pues según dixo, les trabayadores de la Facultá “no tienen porqué saber bable”.

L’alumnu recordó-y a l’alministrativa, que nun s’identificó, que los Estatutos de la Universidá d’Uviéu, dicen nel so artículu 6.2 que naide podrá ser discrimináu por usar l’asturianu y que la Llei d’Usu del Asturianu diz nel so artículu cuartu que tolos ciudadanos tienen derechu a emplegar el bable/asturiano y a espresase nél, de palabra y por escrito y que va tenese por válidu a tolos efectos l’usu del bable/asturiano nes comunicaciones orales o escrites de los ciudadanos col Principáu d’Asturies.

L’alministrativa nun quixo atender a los razonamientos llegales del alumnu nin tampoco atendió a la petición de poner per escrito les razones pa denegar l’usu del asturianu, dexando claro que “nun permitiríen nengún documentu más n’asturianu na Facultᔠcolgando al alumnu y diciédo-y que nun-y entendía lo que dicía.

El CUPA quier denunciar esti casu, que nun ye más que l’amuesa de munchos otros qu’asocende cada día nesta institución y que marxinen a los estudiantes que deciden usar l’asturianu nel so día a día, pesie a lo que dicen los Estatutos de la Universidá, publicaos tamién n’asturianu. Por ello reclamen un cambiu na Universidá d’Uviéu, que suponga una mayor sensiblización y formación del personal de la mesma, pa que nun asocedan casos como esti.

L’alumnu yá presentó una quexa énte’l Decanu y tamién ente’l Defensor del Universitariu y el Defensor del Pueblu.