Asturies promociona la so gastronomía n’Alemaña

El Gobiernu del Principáu, al traviés de la Sociedá Rexonal de Turismu, asiste güei miércoles a la ciudá alemana de Frankfurt pa presentar Asturies como destín gastronómicu nun foru comercial dirixíu a periodistes especializaos en turismu, touroperadores, axencies, clubes y asociaciones turístiques.

Esti taller tien, según comenten fontes gubernamentales, “la peculiaridá d’amosar l’Asturies gastronómica d’una forma interactiva y práctica onde los participantes puen descubrir dellos de los secretos de los productos gastronómicos más atrayentes de la rexón”.

L’actividá va facese de la mano de dos de los cocineros asturianos de mayor prestixu (Luis Alberto Martínez Abascal, de Casa Fermín, y Marcos Morán, de Casa Gerardo), la Sociedá Rexonal de Turismu va promocionar la gastronomía asturiana al traviés de productos tan reconocíos como los quesos o la sidra.

El mercáu alemán ye ún de los más importantes pa desendolcar esta mena d’actuaciones que tienen como oxetivu comercializar Asturies y los sos valores más representativos p’atrayer visitantes nuevos. El turismu alemán, en términos xenerales, conoz mui bien Asturies como destín vacacional y suel inclinase por productos tan integraos na ufierta’l país como’l turismu rural, el de naturaleza y el cultural.