Asina suena ‘Traicionástime’, el cantar de Rosalía pa ‘xuegu de Tronos’

For the Throne, el discu que va llanzar la producción de la serie, va incluyir un cantar de Rosalía: ‘Traicionástime’.

De poques coses fálense más nel mundu seriéfilo nes últimes selmanes que de Xuegu de Tronos. Desque apocayá estrenárase la que va ser la última temporada de la saga, son munchos los fans que punxeron en puxanza les aventures de los siete reinos.

Si a eso xúntase-y otru fenómenu como ye Rosalía, yá nun hai cosa que lu supere. La cantante, que nun para de sumar reproducciones en Spotify y que ta trunfando cola so xira y l’álbum El mal querer, sumóse a For the Throne, el discu que va llanzar la producción.

Tratase d’un recopilatorio de cantares escurríos por artistes de la talla de James Arthur, Muse o The Weeknd. La española, que va tiempu que se ganó un merecíu puestu nesti proyectu, publicó esti vienres la so aportación. El cantar, de 2:46 minutos de duración, llámase Traicionástime y dexa entever el marcáu estilu de la catalana.

La tema fala d’una traición bien destacada na serie, de la qu’esti artículu nun pretende faer nengún spoiler. Podría tratase de dalguna que yá se vio con anterioridad pero, magar que nun se confirmó, tou paez indicar que va ser de daqué que se va ver nos próximos episodios.

Los fans, qu’aplaudieron la nueva tema, aseguren por redes que van tar sollertes para saber de qué fala esactamente Rosalía.