Arranca n’Avilés el proyectu “Por una Europa Inclusiva (INCLUYI)”

El proyectu “Por una Europa Inclusiva (INCLUYI)”, creáu coles mires de trabayar pola inclusión de les persones con discapacidá nos ámbitos del deporte, la cultura y la participación ciudadana, echa a andar esti miércoles n’Avilés cola celebración de la primera de les xuntes previstes.

Esti miércoles 27 arrancó’l Proyeutu “Por una Europa Inclusiva (INCLUYI), escoyíu pola Comisión Europea, cola primera de les actividaes previstes, una xunta  nel Centru Municipal d’Asociaciones d’El Arbolón,  cola presencia del conceyal de Participación Ciudadana, Miguel Ángel García Balbuena, lo mesmo que de representantes de los colectivos de la ciudá que se xuntaron al proyectu.

Impulsáu pol Conceyu d’Avilés, esti proyueutu tien l’oxetivu d’identificar les causes qu’enzanquen la participación de les persones con dalgún tipu de discapacidá n’ámbitos como’l deporte o la cultura. La Comisión Europea concedió una ayuda de 7.500 euros pa la celebración, nel mes de mayu, d’un alcuentru que va axuntar n’Avilés a unes 40 persones procedentes de Saint Nazaire.

Tratase d’un proyectu presentáu pol Conceyu d’Avilés a la convocatoria “Europa colos ciudadanos” pal periodu 2014-2020. La Comisión Europea valoró esta propuesta dientro de la categoría “Ciudaes hermanaes”, yá que nel diseñu y nel posterior desenvolvimientu del proyectu ta implicada la ciudá francesa de Saint-Nazaire, hermanada con Avilés, según l’asociación Auniendo Fronteres, encargada de tender llazos d’unión ente dambes ciudaes hermanaes.