Areces va recibir clases de llingua asturiana por mor del nuevu pautu de gobiernu y l’anunciu de Zapatero de que va compensar a les comunidaes con llingua oficial.

Según anunció en rueda de prensa Ana Rosa Migoya, Conseyera de Presidencia y Vocera del Gobiernu d’Asturies, el Presidente Areces va entamar esti llunes un cursu básicu de llingua asturiana que va recibir nel so propiu despachu y con una periocidá de trés díes selmanales, variando según les sos necesidaes d’axenda. Al paecer esti pasu forma parte de les condiciones impuestes por Izquierda Xunida-Bpa-LV a la FSA-PSOE pal nuevu pautu de gobiernu n’Asturies y vieno a reforzase cola anuncia de Zapatero de que va compensar a les comunidaes con llingua oficial.

Amás, y según anunció tamién la Vocera del Gobiernu, el discursu de Navidá que suel echar el presidente d’Asturies en Nuechevieya, va emitise esti añu en dos versiones, lleíes pol propiu presidente Areces, en castellán y n’asturianu.

Migoya comentó na rueda de prensa que con esti pasu, “vuelve a demostrase la sensibilidá del Gobiernu de la FSA y del propiu Presidente pa cola llingua asturiana”, que recordó, “nun ye nuevu nel presidente Areces”, en referencia a la so participación nos años setenta de les manifestaciones a favor del “bable nes escueles”.

Los llectores más “inocentes” d’Asturnews ablucaron ayeri cola conversión asturianista d’Areces