Andecha píde-y al Conceyu Cangas que caltenga como méritu la conocencia d’asturianu

Andecha Astur píde-y al gobiernu municipal de Cangas del Narcea que caltenga’l so proyeutu de valorar como méritu la conocencia d’Asturianu nes oposiciones a empléu públicu.

Pa la formación independentista “Ye llóxico y normal que se valore positivamente la conocencia de la llingua asturiana n’Asturies pa trabayar pa una alministración que tien qu’atender a ciudadanos/es que se supón tendríen que tener derechu a relacionáse cola alministración n’Asturianu”, considerando irracional que n’Asturies nun se valore conocer la llingua propia. P’AA, “los demás conceyos d’Asturies deberíen facer lo mesmo que’l de Cangas del Narcea”.

La organización d’izquierda nacionaliega vuelve a pidir la oficialidá pa que la llingua propia d’Asturies tenga estatus d’igualdá cola llingua castellana, que ye la oficial del estáu, albidrando la organización que dibe “aforrase polémiques ridícules como ésta”, qu’opinen “son utilizaes polos enemigos de la igualdá democrática de los ciudadanos, de la llingua asturiana, los derechos llingüisticos y de la propia identidá d’Asturies, pa proyectar el so españolismu reaccionariu y siguir avanzando nel xenocidiu cultural d’Asturies”.