Andecha Astur va facer alcordanza de la declaración de soberanía de 1937

La organización política d’izquierda nacionalista convoca una concentración soberanista esti domingu, na Plaza’l Parchís de Xixón y partir de les seis de la tarde, coincidiendo col 71 aniversariu “de la declaración de soberanía de 1937 y de la constitución de la última institución soberana que tuvo Asturies, pel momentu”. Andecha Astur, como vien faciendo nos últimos años, va a concentráse en Xixón “pola Soberanía y el Socialismu” conmemorando la declaración de 1937 y homenaxeando al Conseyu Soberanu d’Asturies y Lleón, “como esperiencia soberana, socialista y antifacista”.

P’Andecha Astur y según comenten al traviés d’una nota prensa “l’aniversariu tien una gran importancia y carga simbólica al tratase d’un momentu nel nuesu pasáu reciente nel que, independientemente de les sos causes, Asturies foi soberana y socialista, oxetivu ésti que, como organización política asturiana y d’izquierda, queremos algamar”.

Nel actu va intervenir Mario Arbesú, Secretariu d’Organización d’Andecha Astur. Dempués de la concentración frente a la “Casa Blanca” que fuera la sede del Conseyu Soberanu) ta programada una espicha nel Llar d’Andecha de Xixón (cai Prendes Pando, 11)

L’aniversariu de la declaración de soberanía coincide esti añu col procesu de reforma del Estatutu polo qu’Andecha Astur centra l’actu d’esti añu na denuncia de “la falta de soberanía del Pueblu Asturianu” ya incidirá “nel derechu de los asturianos y asturianes a decidir sobre todo lo que-yos afecta y en particular a poder votar l’estatutu en referéndu”.

Nesti sen, comenten los independentistes, “esta concentración tamién forma parte de los actos qu’Andecha Astur vien desendolcando cola campaña “¡Queremos votalu!” “. Andecha Astur yá se concentró’l pasáu 13 d’agostu delantre de la Xunta Xeneral n’Uviéu onde la propia organización y decenes de ciudadanos a nivel individual formalizaron nel rexistru la petición formal de referendu.