Anabel Santiago presenta el so nuevu proyectu musical na Selmana Negra

Anabel Santiago debuta esti llunes 11 en Xixón cola nueva formación que l’acompaña nel so proyectu musical paralelu a la so carrera en solitariu como intérprete de tonada. Michael Lee Wolfe y l’Asturiana Mining Company arropiellen a la cantadora casina nel conciertu que protagoniza la nueche de la Selmana Negra esta nueche. Nél, Anabel y los sos músicos van presentar los nuevos temes musicales que van formar parte del so prósimu discu xunta otros del so anterior álbum “Al son de la lluna”.

Anabel Santiago, orixinaria de Casu y residente en Xixón dende cuantayá, va debutar na so ciudá cola nueva formación que l’acompaña nel so proyectu musical alternativu a la tonada y nel que busca la esperimentación con nuevos sones de les más variaes procedencies. Temes tradicionales xunta canciones de propia composición y lletra de poetes asturianos como Xuan Bello, Lourdes Álvarez o Taresa Lorences formen el repertoriu que va echar la cantante nel escenariu de la Selmana Negra.

Santiago, escoyida como una de les diez voces principales de l’asturianada apocayá en Mieres por un xuráu d’espertos, va ufiertar al públicu xixonés esta otra faceta de la so carrera como artista na que busca caminos diferentes y modernos pa la canción n’asturianu. La cita ye a les 23.00 hores nel escenariu central de la Selmana Negra.