Javier Maqua cuenta la hestoria del últimu delincuente común fusiláu nel franquismu

L’escritor y cineasta Javier Maqua presenta esta tarde na Selmana Negra de Xixón el so últimu llibru: “Fusilamiento (Instrucciones de uso)”, una novela documental na que se recrea la hestoria del últimu delincuente común fusiláu nel franquismu. Estructurada cásique como un guion, la novela de Maqua, reconstrúi al través de remembrances, correspondencia vía electrónica y reflexones del narrador la crónica d’una muerte olvidada. Al fondo de la hestoria del axusticiáu, el rumor cercanu de la guerra d’Irak y de los sucesos vivíos en mundu tres el 11-S de Nueva York.

L’alcuentru casual nunos talleres sobre escritura de documentales llevó al autor de “Fusilamiento” a conocer a dalguién que ficiera una película amateur sobre’l fusilamientu en 1972 del soldáu P.M.M. de Gandía, condenáu a muerte por asesinar a dos muyeres, madre y fía, pa roba-yos. L’asesín, un delincuente de poca monta con bultable retrasu mental, ye namás una sombra llonxana sobre la que se proyecta la busca de Javier Maqua al través de la complicidá del otru personaxe narrador: Debé, el rapaz que lu llevó a interesase por ésti últimu fusiláu del franquismu.

Maqua utiliza los materiales reales d’aquel intercambiu de correspondencia por corréu electrónicu: los propios mails, fotografíes reales del delincuente P.M.M. y del so entornu familiar, xunta les sos reflexones personales sobre la hestoria y la aplicación del so desconciertu críticu dica fechos d’inxusticia sucedíos na realidá más actual, como’l nuevu orde mundial impuestu polos Estaos Uníos na so particular cruzada contra’l nomáu Exe del Mal.

Javier Maqua -autor como cineasta de filmes como “Apuntarse a un bombardero”, “Chevrolet” o “Carne de gallina”, presenta la so última novela “Fusilamiento (Instrucciones de Uso)”(Algaida, 2005) esti llunes 11 a les 19.30 na Carpa de Radio Kras en la Selmana Negra de Xixón, nun actú organizáu pola emisora independiente y la Sociedá Cultural Xixonesa. La presentación va tar a cargu del escritor y redactor d’Asturnews Pablo Antón Marín Estrada. Mañana, Maqua va tener en Xixón una xinta de presentación a los medios de comunicación de la so novela.