Amenábar torna a España 14 años dempués

La última vegada qu’Alejandro Amenábar rodó n’España, y en castellán, ganó’l Oscar a la meyor película de fala non inglesa y agora torna a España con una temática que nunca encarara: la memoria histórica y la Guerra Civil.

La última vegada qu’Alejandro Amenábar rodó n’España, y en castellán, ganó’l Oscar a la meyor película de fala non inglesa y batió el récord de Goyas ganaos: 14. Facialo cola película Mar Adientro, que s’estrenó en 2004 y tuvo un ablucante ésitu de públicu y crítica. De magar, los sos filmes siguientes, como Ágora en 2009 y el thriller Regresión va dos años, decidió desenvolvelos fora del so país natal y rodalos n’inglés.

Agora, 14 años dempués, vuelve a España con una temática que nunca encarara: la memoria histórica y la Guerra Civil. Asina lo reconoció nuna entrevista a RAC 1, onde aseguró que la preproducción yá empezó cola previsión de rodar en primavera. El mesmu Amenábar va escribir tamién el guión, como ye habitual nos sos proyectos. La cinta va cuntar con un presupuestu de 6,38 millones, la producción de Fernando Bovaira y la so compañía MOD, y yá foi escoyida’l pasáu ochobre pa recibir una ayuda pública de 1,4 millones. El cineasta nun quixo anunciar el protagonista del filme, anque dixo que yá foi escoyíu.