Millones d’ordenadores afectaos por un fallu nos procesadores d’Intel

Intel, el xigante de los microprocesadores, enfrentase a una de les sos peores crisis en 50 años, al vese millones d’ordenadores en tol mundu afectaos por un fallu nos sos procesadores.

Un grave erru nel diseñu de los sos procesadores podría acarretar serios problemes de seguridá tantu para fabricantes y desarrolladores como para usuarios de los procesadores d’Intel, según publicó  estos díes The Register.

Nun se conocen nin les causes nin l’algame del fallu, pero según los desarrolladores de Linux el problema ye grave y complicáu de resolver. Nun comunicáu, Intel asegura que’l fallu nun dexa modificar nin esaniciar datos del sistema y añede qu’esti diseñu nun ye esclusivu de los procesadores de la compañía.

Esti erru nos procesadores da accesu a cualquier aplicación a espacios de memoria reservaos. Un hacker podría aprovechar esti erru para ganar permisu de “superusuariu” y controlar el sistema de forma remota. Asina, l’atacante podría aportar a la memoria del núcleu del sistema operativu, l’espaciu ocultu onde se guarda información sensible como contraseñes.

Para protexer esta información, la memoria del núcleu ta estremada en distintos espacios, pero al traviés d’esti fallu un atacante puede aportar d’un espaciu a otru. Según los espertos, l’erru non puede resolvese con una actualización del microcódigo; la única forma ye por aciu parches nel sistema operativu de cada dispositivu.

Desarrolladores de Linux yá crearon una actualización del sistema para arreglar los problemes derivaos del fallu de diseñu de el procesadores d’Intel. Agora espérase que tanto Apple como Microsoft faigan lo mesmo. Esta solución va tener consecuencies negatives nel rendimientu de los aparatos, anque Intel asegura que nun va ser significativu pal usuariu mediu. Según los primeros estudios realizaos en máquines Linux parcheaes, la baxada de rendimientu ta ente un 5% y un 30%, porcentaxe podría variar en función de la plataforma y amenorgase en futures actualizaciones.

L’erru non solo afecta a ordenadores domésticos y tablets, sinón que tamién tien un impactu sobro plataformes na nube y grandes centros de datos que dan serviciu a miles d’empreses. Según The Register, tolos procesadores de 64 bits creaos na última década contendríen l’erru. Intel controla’l 80% del mercáu de procesadores pa ordenadores y más del 90% del mercáu de procesadores pa portátiles y servidores, lo que supondría xuna afectación en millones de máquines en tol mundu.