Portada Música Álvaro Álvarez ganó’l Concursu de Gaita de Bimenes

Álvaro Álvarez ganó’l Concursu de Gaita de Bimenes

by asturnet

Esti domingu pasáu, 6 de xunetu, tuvo llugar en Martimporra la final del XV Concursu de Gaita de Bimenes, certame entamáu pol Conceyu Bimenes coincidiendo cola Fiesta de la Oficialidá, cellebrada’l día enantes. El ganador d’esta edición foi’l gaiteru sierense Álvaro Álvarez Fernández, de 19 años d’edá, que llevó los 300 € en metálicu y el troféu del primer premiu. Amás, al ganador apurrióse-y un exemplar del “Cancioneru de la gaita asturiana”, obra iguada por Eugenio Otero Vega, Fonsu Fernández García y Gausón Fernande Gutierri, editada, y donada pa la ocación, pol Muséu del Pueblu d’Asturies.

El segundu premiu, dotáu con 200 € y troféu, foi pal gaiteru Fernando Vázquez Cárcaba, de 20 años y tamién de Siero. Y el ganador del tercer premiu, al que se-y apurríen 100 € y troféu, foi Diego Lobo Tuñón, de 19 años y que vieno del conceyu d’Ayer. Nel concursu participaren finalmente trece gaiteros y gaiteres qu’interpretaren dos pieces cada ún, siendo valoraes les mesmes por José Ramón García Navia, Eugenio Otero Vega y José Luis García Díaz, miembros del xuráu na edición d’esti añu.

Tamién te podria gustar