Adrián Barbón presume del sistema educativu asturianu

40.293 estudiantes de Secundaria y Bachilleratu empezaron esti vienres un cursu que’l presidente inauguró en L’Infiestu, onde eponderó la educación pública calificándola de “primer nivel”.

Si’l martes volvieron al cole los 65.577 escolares de la rexón, el vienres retomáronse les clases nos institutos. Son 40.293 estudiantes, 31.509 matriculaos n’Educación Secundaria Obligatoriu y 8.784 en Bachilleratu, qu’encaren el nuevu cursu y escueyen, nun 75%, la educación pública. Precisamente esto quixo poner en valor el xefe del Executivu autonómicu, Adrián Barbón, mientres la visita que realizó, al pie de la conseyera Carmen Suárez, al institutu de Infiesto (Piloña), onde foi recibíu por una decena d’alumnos que tocó con flauta duce l’himnu d’Asturies.

De los 40.293 estudiantes que retornaron al institutu, la gran mayoría decantase polos centros públicos. Estos sumen 21.693 estudiantes en Secundaria, de los cualos 11.298 son chicos y 10.395 chichas; y 8.540 en Bachilleratu, de los cualos 3.974 son alumnos y 4.566 son alumnes. Pela so parte, en colexos privaos y alcordaos inscribiéronse na ESO 9.816 estudiantes (4.984 mozos y 4.832 moces) y 244 en Bachilleratu (106 alumnos y 138 alumnes).

«Pal Gobiernu del Principáu la educación ye l’ascensor social, el meyor exemplu de nivelación de la desigualdá y l’única oportunidá p’aquellos que nun tienen otres», remarcó Barbón, aportunando na idea que yá punxo de manifiestu’l miércoles nel Colexu Rural Arrexuntáu de Villayón, onde inauguró’l cursu escolar. El presidente considera «fundamental faer un apueste pola educación pública calidable que llegue a toes partes; que llegue a los núcleos rurales y a tolos pueblos y dexe caltenelos con vida pero que facilite, sobremanera, esa crecedera personal».