Adele revela que prepara un nuevu discu para setiembre

La cantante británica Adele prepara un nuevu álbum que se va publicar en septiembre, según reveló mientres una actuación nuna boda cola so grabación asoleyada al traviés de les redes sociales. Nesi vídeu espublizáu pola revista Variety pue sentise como la británica pide a los asistentes que tean sollertes al so próximu trabayu dientro de siete meses.

Nesa actuación privada, Adele sosprendió al públicu con unu de les temes del so segundu álbum, Rolling in the Deep , y versiones de les Spice Girls (Spice Up Your Life), Candi Staton (Young Hearts Run Free) y Beyoncé (Crazy in Love). El representante de la cantante refugó faer declaraciones a Variety sobro’l supuestu nuevu discu, magar los rumores sobro un nuevu álbum circulen poles redes dende va un mes, cuando él mesmu reconocía qu’habría música nueva anguaño.

Adele ufiertó yá una pista sobro la posible salida al mercáu del discu’l pasáu mayu, cuando reveló que’l nuevu proyectu sería una grabación drum‘n’bass . Entá asina, y cola recién separación del so maríu Simon Konecki, presuponse qu’el so nuevu álbum va tratar d’esti fechu, dáu’l calter personal de les lletres compuestes pola cantante.

L’artista algamó l’ésitu en 2011 col álbum 21 y batió récords de vientes cuatro años dempués con 25 , del que vendió más de 3,38 millones de copies nos Estaos Xuníos na so primer selmana nes tiendes. Ye de les poques cantantes que puede presumir de tener dos discos percima de les 20 millones de vientes.