Portada Educación 18 centros educativos d’Avilés entamen el proyectu “La cápsula del tiempu”

18 centros educativos d’Avilés entamen el proyectu “La cápsula del tiempu”

by redacción asturnews

Un total de 18 centros educativos d’Avilés participen nel proyectu “La cápsula del tiempu”, impulsáu por Ayuda en Acción Asturies, en collaboración cola conceyalía d’Educación del Conceyu d’Avilés, la Universidá d’Uviéu y l’Axencia Asturiana de Cooperación al Desenvolvimientu.

La selmana pasada tuvo llugar la xunta que marca l’entamu del desenvolvimientu del proyectu. cola conceyala d’Educación, Nuria Delmiro, participando na sesión de coordinación con responsables de los 18 centros educativos que van llevar la iniciativa a les aules de 5º cursu de Primaria, 3º cursu de Secundaria y d’Educación Especial, con una participación envalorada d’un millar d’alumnos y alumnes.

“La cápsula del tiempu” ye una actividá educativa que’l so fin últimu ye recoyer, en dellos formatos, los testimonios d’alumnáu, profesoráu, families, entidaes sociales y responsables políticos al respective de la pandemia, pa dempués depositalos nuna cápsula del tiempu.

Tratar de recoyer les llecciones aprendíes mientres esti periodu, y les entrugues y duldes sobro cómo se va a encarar la nueva etapa y el futuru de la educación na mesma. Ye tamién la continuación del trabayu desenvueltu en campañes anteriores como la denominada LaMejorLección, que convidaba al alumnáu a espresar les sos sensaciones mientres el confinamientu. Nesti sentíu, la situación xenerada pol COVID-19 puede suponer una oportunidá pa, dende la esperiencia, la reflexón y l’aprendizaxe, dar el saltu a un nuevu modelu d’educación que refuerce valores como la inclusión, l’aprendizaxe cooperativu, la igualdá y la corresponsabilidad.

Al traviés del proyectu “La cápsula del tiempu” preténdese reimaxinar y redibuxar una educación por y pa toos y toes, nel marcu de ciudaes verdaderamente educadores, énte un periodu que s’antoxa como un cambéu d’etapa, ensin dexar pasar la oportunidá d’aprender de lo vivío.

Más información

Tamién te podria gustar