Un proyectu de la Universidá quier convertir los móviles en ‘miniescáneres’

Convertir los teléfonos móviles en ‘miniescáneres’ que ven al traviés de los oxetos ye l’obxetivu del prototipu que consiguió desenvolver un equipu d’investigadores de la Universidá d’Uviéu. El proyectu, denomináu ‘Millihand’, púnxose en marcha en 2019 col propósitu de resolver retos sociales gracies a la tecnoloxía.

Nesti tiempu, sigún desplicó’l profesor ya investigador Jaime Laviada Martínez de la Universidá d’Uviéu, l’equipu avanzó na creación de dispositivos novedosos que pueden emplegar na ropa o inclusive na mesma mano. «Diseñemos un sistema d’imaxe electromagnética que consigue tresformar los teléfonos móviles n’escáneres que nos dexen ver al traviés d’oxetos como’l papel, el cartón o la ropa, esactamente igual que los sistemes de seguridá que s’utilicen nos aeropuertos de too el mundu», indicó Laviada. Unu de los oxetivos del proyectu ye diseñar un radar integráu na ropa que pueda ser emplegáu por persones con discapacidá visual pa detectar y sortear torgues.

L’afayu ye frutu del trabayu del Grupu de Teoría de la Señal y Comunicación de la Universidá d’Uviéu y enmárcase nel proyectu ‘Tecnoloxíes avanzaes n’ondes milimétriques pa dispositivos vestibles o de mano’ (Millihand). Amás, cuenta con financiamientu del Plan Nacional d’I+D+i.

Según indiquen dende la institución académica asturiana, estos prototipos empleguen los «sensores presentes en teléfonos móviles d’última xeneración pa convertilos en miniescáneres con idéntiques resultancies en términos calidable y eficacia y un preciu muncho más algamadizu».