El rector de la Universidá d’Uviéu espera empezar 2017 con un contratu-programa dotáu con seis millones

El contratu-programa ente la Universidá d’Uviéu y el Principáu va ser posible si s’atuenderal sofitu amosáu por tolos grupos parlamentarios mientres l’Alderique d’Orientación Política celebráu esta mesma selmana na Xunta Xeneral del Principáu, sigún dexó afitao’l rector, Santiago García Granda, qu’entiende que va ser posible debíu al sofitu amosáu por tolos grupos parlamentarios na Xunta Xeneral.

«Lo ideal sería empezar el próximu añu con un contratu-programa». Con estes palabres faía pública la so esperanza de llograr un marcu de collaboración ente’l Gobiernu del Principáu y l’Universidá d’Uviéu’l rector de la mesma, Santiago García Granda, a la salida de la xunta caltenida pol Conseyu de Gobiernu de la institución académica na mañana d’ayeri. El rector manifestó que, al so entender, el contratu-programa va ser posible pol sofitu amosáu por tolos grupos parlamentarios mientres l’Alderique d’Orientación Política celebráu esta mesma selmana na Xunta Xeneral del Principáu: «La Cámara ta bien entornada cola Universidá», afirmó García Granda.

Dichu oxetivu puede algamase, amestó, al traviés del Presupuestu Xeneral del Principáu, pero tamién vía créditos estraordinarios que complementen un escenariu de prórroga. Una prórroga, apuntó, que nun tendría de repercutir na Universidá, una y bones l’Executivu autonómicu asumió compromisos de financiamientu cola institución pal periodu 2015-2018. García Granda amosóse confiáu en qu’estos compromisos calténganse y actualicen pal próximu exerciciu. El rector recordó tamién que’l mentáu contrato- programa, que podría ser evaluáu cada cuatro años o de forma añal, tien de tener venceyada una dotación económica cercana a los seis millones d’euros añales pa potenciar una meyora docente, de la empleabilidá, del llabor investigador y de la tresferencia de conocencia, y l’actualización tecnolóxica de la Universidá.