Lurdes Álvarez, José Luis Piquero y la Fundación Belenos algamen el premiu Timón 2017

Un xuráu integráu por José Rogelio Álvarez Hevia, Esther García López, Humberto Gonzali, David M. Rivas, Pilar Sánchez Vicente y Xuan Xosé Sánchez Vicente, actuando de secretaria María Teresa González Cobos, alcordó esta fin de selmana conceder os Premios Timón d’esti añu a Lurdes Álvarez, José Luis Piquero y la Fundación Belenos.

Los Premios Timón 2017 nes sos modalidaes respeutives concediéronse a les persones y entidá que siguen: El XI PREMIU TIMÓN, p’autores en llingua asturiana o n’eonaviego, a la escritora Lurdes Álvarez; el VIII PREMIO TIMÓN p’autores asturianos en llingua castellana, al poeta y traductor José Luis Piquero; y el V PREMIU TIMÓN DE CULTURA ASTURIANA, p’asociaciones, fundaciones, instituciones y personalides que difundan la identidá cultural d’Asturies, a la Fundación Belenos.

El xuráu quier destacar na trayectoria de los dos gallardonaos nes modalides lliteraries, Lurdes Álvarez y José Luis Piquero, l’apueste pola creación d’unes obres lliteraries de gran calidá qu’espeyen una voz singular y que son a constituyise como referentes mui significativos de la Poesía Asturiana. Nel casu del premiáu na modalidá de Cultura Asturiana, quierse reconocer un trabayu de munchos años desarrolláu per aciu de conferencies y homenaxes, del Seminariu d’Estudios Asturianos y, mui n’especial, de la revista Asturies. Memoria encesa d’un País que vienen publicando dende 1996.

Les distinciones de los Premios, consistentes nuna obra del escultor y ceramista xixonés Jesús Castañón pa cada modalidá, entregaránse en 2017 mientres la cellebración de la 12ª edición de L’Arribada. Los ganadores n’otres ediciones fueron, del Premiu Timón, Nené Losada Rico (2007), Xuan Xosé Sánchez Vicente (2008), Manuel García ‘El Galano’ (2009), Roberto González-Quevedo (2010), Vicente García Oliva (2011), Antón García (2012), Miguel Rojo (2013), Xosé Bolado (2014), Esther Prieto (2015) y Esther García López (2016); del Premio Timón, Luis Fernández Roces (2010), Juan Méjica (2011), Fernando Menéndez (2012), Gonzalo Suárez (2013), Carmen Ruiz-Tilve (2014) Francisco García Pérez (2015) y Pilar Sánchez Vicente (2016); y del Premiu Timón de Cultura Asturiana, l’Asociación Cultural Ensame Sidreru (2013), la Xunta pola Defensa de la Asturiana (2014), l’Asociación pola Recuperación de Sidros y Comedies “El Cencerru” (2015) y Ramón d’Andrés (2016).