Portada Conceyos Uviéu y FETEAS convoquen l’I Concursu de Proyectos de Producción Escénica Amateur 2019

Uviéu y FETEAS convoquen l’I Concursu de Proyectos de Producción Escénica Amateur 2019

by redacción asturnews

El conceyal y presidente de la Fundación Municipal de Cultura d’Uviéu, Roberto Sánchez Ramos, y el presidente de la Federación d’Asociaciones del Principáu d’Asturies (FETEAS), José Ramón López, presentaron esta selmana en rueda de prensa, la convocatoria del Concursu ‘Proyectos de Producción Escénica Amateur 2019”. L’oxetu del concursu ye dar sofitu a la creación nel ámbitu de la escritura dramático, de les artes escéniques y de la captación de nuevos públicos.

A xuiciu de Sánchez Ramos, “el proyectu escoyíu va optar a una ayuda de 3.000 euros pa la producción del testu y tamién va ser contratáu pal so estrenu nel marcu del XIV Festival de Teatru Amateur del Principáu d’Asturies. Tratar de buscar y afalar, abrir la posibilidá a qu’apaezan nuevos testos sobro’l teatru n’Asturies”. Y el presidente de FETEAS aprofió que “ye la primer vegada que se convoca un concursu d’estes característiques, un proyectu con 3.000 euros de premiu, xuna cantidá abonda pa crear una nueva producción nel mundu amateur de manera que sían nueses compañíes les que lo desenvuelvan de cara al próximu añu”.

La selección del proyectu va ser realizada por un xuráu integráu por persones cualificaes y rellacionaes col teatru. El fallu fadrá públicu nel mes de xunetu mientres la entrega del Premiu Escenamateur’ del Festival Nacional de Teatru Amateur ‘Ciudá d’Uviéu’ que se va celebrar los díes 5,6 y 7 de xunetu.

Les compañíes escoyíes nesta fase nacional del festival fueron trés, d’ente les 120 que se presentaron al proyectu, la compañía cántabra Corocotta, con Hestories íntimes del paraísu’, la madrilana Farsa Teatru con ‘Los fusos de la memoria’ y la compañía Carpe Diem Teatru con ‘El caballeru de olmedo’, de Castiella La Mancha.

Los interesaos nel certame tendrán d’unviar per corréu electrónicu a secretariatecnicagmail.com tola documentación antes del 30 de xunu. Los documentos que se riquir son xuna ficha bibliográfica del autor, xuna ficha perfil de los personaxes, síntesis argumental, esplicación de los motivos de la elección del testu ya interés de la propuesta escénica y l’esposición de les pautes estétiques y estilístiques de la puesta n’escena. Tamién va ser necesariu xuna descripción del planteamientu escénicu, historial del grupu, plan de trabayu y desenvolvimientu según la solicitú de participación debidamente rellenada.

Tamién te podria gustar