El Partenón encara una llarga restauración y vuelve pidir les sos pieces a Londres

El Conseyu Arqueolóxicu Central del Ministeriu de Cultura griegu, más conocíu poles sos sigles KES, autorizó la pasada selmana la restauración de delles partes de la cámara central del Partenón. Esta estancia, conocida tamién como cella o naos, yera la parte sagrada de los templos clásicos na que se guardaba la estatua al que taba dedicáu, nesti casu a la diosa Atenea.

N’aprobándose la midida, que se calcula que se va realizar a lo llargo de los próximos 15 años, la secretaria xeneral del Ministeriu de Cultura, Maria Andreadaki-Vlazáki aseguró qu’amás recuperar gran parte de la xeometría del edificiu, recuperase tamién la identidá y hestoria del monumentu, lo que va dexar al visitante tener “una meyor comprensión de la so arquitectura”. Para llevar a cabu la reconstrucción, van utilizase 360 sillares orixinales, que se topaben esvalixaos alredor del templu, amás de añedir otros 90 nuevos de mármol de Dioniso, un tipu de piedra asemeyada a la orixinal. Siempres basándose na propuesta efectuada por Charalambos Bouras, l’arquiteutu que presidió hasta’l so fallecimientu en 2016 el Comité de Caltenimientu de Monumentos de l’Acrópolis.

L’ambiciosu proyectu fala de la recuperación de la cámara interior. Sicasí, son delles les voces que yá apunten al que promete ser el siguiente pasu: el frisu interior que percuerre’l muriu de la nave. Un frisu que prácticamente se caltuvo intactu hasta que l’escultor italianu Lord Elgin dixebró les partes que consideró más guapes. Aquelles pieces acabaron como una de les Cariátides del Erecteión, nel Muséu Británicu.

Agora, el presidente de Grecia pidió a les autoridaes britániques que “lliberen” los mármoles del Partenón de la so “escura prisión”. “Nun pidimos la devolución d’otros bienes culturales dende l’estranxeru. Pidimos la torna de les escultures por que el Partenón pueda volver simbolizar una vegada más para l’home y para la humanidá lo que l’arte humano y la civilización d’entós, pretendía que representara”, afirma’l presidente de Grecia, Prokopis Pavlopoulos.

Nun ye la primer vegada que los griegos faen esta solicitú, que s’intensificó en 2009, dempués de que se abriera un nuevu muséu al pie de la l’Acrópolis. Pela so parte, los británicos respuenden una y otra vez al mesmu pidimientu alegando qu’adquirieron los mármoles “de forma llegal” al imperiu otomanu.