Padres d’alumnos creen que camudar el calendariu escolar ye «un despropósitu»

Les principales asociaciones qu’arrexunten a les families de la escuela pública y de l’alcordada refuguen frontalmente la posibilidá de desligar les vacaciones escolares de les fiestes relixoses. Foi una propuesta del Conseyu Escolar d’Asturies nel so informe ‘L’estáu y la situación del sistema educativu asturianu’, nel que se pide «un calendariu pedagóxicu equilibráu que favoreza’l procesu d’enseñanza».

Pública y alcordada tán esta vegada d’alcuerdu. Clara Díaz, de la Federación d’Asociaciones de Padres d’Alumnos Miguel Virgós, ta especialmente cafiante. «Si yá agora ye difícil conciliar, imaxínate si’l calendariu escolar dexa de coincidir col llaboral. Ye imposible, un despropósitu», repite una y otra vez. Nun-y val nenguna xustificación: «Falen de cuestiones pedagóxiques, pero informes a favor y en contra tenemos toos. Que tamién los hai en contra de la xornada continua». Y saca equí una tema espinosa. Yá en 2015, cuando la Xunta de Personal Docente non Universitariu fixo la primer propuesta pa convertir los tradicionales trimestres en cinco periodos lectivos y otros tantos vacacionales, les families punxeron eso sobro la mesa: falemos de tolos tiempos escolares’, dixeron. Y eso incluyía aldericar sobro l’ésitu y el fracasu de la xornada continua (mayoritaria en tola rede pública de la rexón), sobro les extraescolares, sobro deberes… Tres unos meses de discutiniu nel senu del Conseyu Escolar, la Xunta de Personal entendía que la so propuesta nun diba a fructificar y retirar.

Pero l’alderique quedó ende. Y dende la Miguel Virgós nun lo escaecen. «La xornada continua ye un desastre», diz de forma categórica. El principal problema, asegura la so presidenta, ye que «nel so momentu prometieron que se diba a facilitar la conciliación, que los centros abriríen peles tardes, pero nun se cumplió». Y a la fin, tou queda en manos, llamenta «de les posibilidaes económiques que tengan les families, de la voluntariedá del centru y del AMPA y de la collaboración de los conceyos». Y too ello, en munchos conceyos, nun se da.