Portada Sociedá Uviéu celebra’l Día Internacional de les persones con discapacidá nel Teatru Pumarín

Uviéu celebra’l Día Internacional de les persones con discapacidá nel Teatru Pumarín

by redacción asturnews

La conceyala delegada de Polítiques sociales, Leticia González, presentó ayeri, en rueda de prensa, la II Xornada del 3 d’avientu, Día Internacional de les persones con discapacidá n’Uviéu, dientro del Plan estratéxicu de “L’Uviéu de les Persones”, que va celebrase esti martes de 10.30 a 13.30 hores, nel Teatru de Pumarín, que yá tien l’aforu completu.

La conceyala de l’área aseguró que “dende’l Conceyu d’Uviéu y más concretamente dende la conceyalía de Polítiques sociales y Deporte, en collaboración col movimientu asociativu y recursos de persones con discapacidá del conceyu, celébrase esti día cola cuenta de sensibilizar ya informar a la ciudadanía de les munches habilidaes y capacidaes que tien esti colectivu de persones”.

El Día internacional de les Persones con Discapacidá, recordó, “foi declaráu en 1992 pola Asamblea Xeneral de les Naciones Xuníes por aciu el resolvimientu 47/3 coles mires de promover los derechos y el bienestar de les persones con discapacidá en tolos ámbitos de la sociedá, según concenciar sobre la so situación en tolos aspeutos de la vida política, social, económica y cultural”.

El programa d’actuaciones y entidaes que participen na Xornada, aseguró Leticia González, inclúi “una interpretación audiovisual, al cargu de la Asociación de Padres y Amigos de Persones con Discapacidá Auditiva (APADA Asturies); ‘Somos capaces’ (Down Asturies); un vídeu audiovisual sobre ‘El corazón de APACI’, al cargu de APACI Asturies; ‘Piacere: Compartiendo y creciendo’, al cargu de Marcos Suárez y Verónica Sánchez, del CAI Vinjoy y voluntarios y voluntaries d’esta entidá; Danza inclusiva, una amuesa del procesu de iniciación de Centros sociales; pianu de la mano de Albéniz Asturies- Retina Asturies y actuación coral ‘Llibre-mente’, por Afesa Asturies”. Amás, indicó la edil, “va acompañanos una persona que na actualidá ye identificada por munches de les persones con discapacidá como iconu a siguir, por ser un llogru de superación, cuidao que consiguió esaniciar munches barreres pa ser la primer muyer en participar nel Mundial de surf, nuesa deportista Carmen López”.

Tres l’ésitu d’esta edición –cubriéronse yá les 223 disponibles-, la conceyala adelantró que s’estudia treslladar pa 2020 l’actu a una redolada con mayor aforu”. Tamién adelantró que “yá planiemos un ciclu de teatru y artes escéniques, que se va desenvolver a lo llargo de los próximos meses: 25 de marzu, 19 de mayu y 16 de xunu, como parte de la ufierta de les actividaes del Teatru Filarmónica, onde actores, intérpretes y protagonistes van ser persones con discapacidá, dellos amateur y otros con munchos años de trayectoria y esperiencia nel mundu de la interpretación”.

Tamién te podria gustar