“El xuegu de Yalta” llega esti xueves a Xixón de la mano de Telón de Fondo

L’Atenéu de La Calzada, en Xixón, va acoyer esti xueves a les siete la tarde, la puesta n’escenar de la obra “El xuegu de Yalta” pol grupu de teatru Telón de Fondo, qu’estrenó la obra en Colunga la selmana pasada. La entrada ye de baldre.

La obra ye l’adaptación del cuentu d’Antón Chéhov “La dama del perrín” fecha pol autor irlandés Brian Friel y con versión n’asturianu de Lluis Antón González. Dirixida por Sara García Rodriguez, ta interpretada por Marilú Casas y Lluis Antón González con espaciu escénicu y lluces de Benigno García Bueno y produción de Xulio Vigil.

Na obra, Ana Sergeyevna y Dmity Gurov tán de vacaciones en Yalta, ciudá de veranéu del Mar Negru y lo que escomienza siendo un xuegu, conviértese nun amor verdaderu que sumirá a los sos protagonistes nun remolín llocu.