Portada Educación Los interinos d’Asturies manifiéstense pa pidir concursos basaos na antigüedá

Los interinos d’Asturies manifiéstense pa pidir concursos basaos na antigüedá

by redacción asturnews
Foto: srgpicker (https://www.flickr.com/photos/srgblog/)

La cai Fruela n’Uviéu acoyó una concentración de la Plataforma d’Interinos, Llaborales y Personal Estatutario d’Asturies (PIAS) que solicita, pal casu de les persones que lleven trabayando más de trés años, que l’Alministración regularice’l so puestu de trabayu con un concursu de méritos basaos na antigüedá como únicu méritu.

Asina lo indicó’l voceru de PIAS n’Asturies, Antonio Navarro, que criticó l’alcuerdu ente’l ministru de Facienda, Cristobal Montoro, y los sindicatos UXT, CCOO y CSIF, p’ameyorar la ufierta d’empléu públicu.

La plataforma d’interinos refuga que se recurra a una gran ufierta d’empléu públicu que «resalva clamorosamente» el derechu de trabayadores temporales que lleven trés años o mas. Consideren qu’esa ufierta d’emplegu nun ye más qu’un espediente de regulación d’empléu, porque namá va significar sustituyir unes persones por otres, nuna especie de «recambiu de personal».

Esixen l’aplazamientu de l’actual ufierta d’emplegu públicu hasta que se regularice la so situación llaboral, que consideren que constitúi un fraude de llei: “Cualesquier alternativa negociadora que nun traiga l’afitamientu del 100% de les persones afectaes nun va ser almitible”, afiten. Na concentración n’Uviéu pudiéronse lleer conseñes en distintes pancartes como ‘Los que tán, quédense’ o ‘Llaboral, va dite bien mal, yá nun yes necesariu’.

Tamién te podria gustar