Lliteratu, una nueva revista dixital sobre lliteratura asturiana

02 00:48 2005 Imprimir

Sal el primer númberu de la revista dixital “Lliteratu”, una publicación que cuenta cola participación de los llectores como parte fundamental del so proyectu. Una axenda cultural, les bases de diferentes concursos lliterarios, reseñes, noticies, reportaxes, entrevistes y una serie de secciones pensaes na participación de los llectores son dalgunes de les propuestes d’esta nueva publicación qu’echa a andar cola intención de dar a conocer un poco más la lliteratura asturiana.

Nesti primer númberu de “Lliteratu” puen vese les diferentes visiones del mundu de tres autores que tán de plena actualidá pola publicación de nueves obres, como ye’l casu de Nel Amaro, Xuan Santori y Ismael González Arias. Asinamesmo, Martín López-Vega atrévese a xugar al entreteníu formatu de l’autoentrevista; un cuestionariu nel que’l propiu autor fai d’entrevistador y entrevistáu.

Como ún de los enfotos que tien esta revista ye’l d’allegar la lliteratura a los llectores, valiendo tamién de plataforma na que puean participar unviando lo que-yos pete, Lliteratu ufierta la posibilidá de mandar poemes y relatos mesmo d’autores conocíos que-y presten al llector como de testos propios. Per otra parte, pue participase na ellaboración d’un prestosu relatu encadenáu onde caún pue llevar la historia per onde-y paez faciendo que nunca nun se sepa de qué manera va siguir nel siguiente númberu.

Nes prósimes selmanes, “Lliteratu” tien previsto l’estrenu de nueves secciones pensaes pa los escolinos. De manera qu’ellos tamién puean opinar sobre los llibros que van lleendo na escuela y de les actividaes que faen ellí, amás de mandar los sos propios poemes y cuentos.

Lliteratu

  Categories:
Loading Facebook Comments ...