Lliteratu saca un especial sobre’l Mieres más lliterariu

La revista lliteraria dixital Lliteratu, de recien creación, saca un númberu especial dedicáu al Mieres más lliterariu. Cola escusa de la conmemoración de la XV edición del Premiu Teodoro Cuesta de poesía, y del cabudiañu de la muerte del popular poeta mierense, Lliteratu rescata la memoria de los personaxes que dio esta villa a lo llargo de la historia, al tiempu que dedica les sos entrevistes a cuatro poetes que se fixeron nos últimos años col prestixosu galardón poeticu.

Tres escritores tan diferentes como Xabiero Cayarga, ganador del Teodoro Cuesta nel añu 2000 col poemariu ‘Pequeña Europa’; Xuan Bello, que lu consiguiere en 1993 col llibru ‘El llibru vieyu’ y Ánxel Álvarez Llano, premiáu por ‘Na mesma piedra’ nel 2001, contesten a la sección ‘Tres escritores, tres llectures’; mentes que Pablo Antón Marín Estrada, ganador nel añu 1997 col poemariu ‘Otra edá’ failo na sección ‘Autoentrevista’.

Pero non solo se fala de poesía. La lliteratura asturiana ta enllena de firmes d’escritores naturales del valle del Caudal, como ye’l casu de Fulgencio Argüelles, Lourdes Álvarez, Xuan Santori, Jose Luis Piquero o’l propiu Tiadoru Cuesta. Pero primero y amás d’ellos hebo otros que tamien escoyeron el camín de les lletres pa siguir la so trayectoria vital. De manera que los reportaxes especiales de Lliteratu ayúdennos a siguir la historia de la villa de Mieres al travies de la vida y les obres de los sos personaxes, dalgunos d’ellos cuasi escaecíos, rescatando la memoria d’homes y destinos tan estremaos como los de Diego Suárez Corvín, nacíu en 1521, Rodrigo Álvarez Albuerne o Julián Burgos, ente otros.

Escritores, obres, noticies y, por supuesto, la collaboración de los llectores, completen esti segundu númberu de la nueva revista dixital.

Web de Lliteratu, Revista Cultural