Llacín entama esta fin de selmana la XXV edición del Mercáu de Porrúa

L’Asociación Cultural Llacín entama demientres la fin de selmana del sábadu 25 y domingu 26 d’Agostu, la XXV edición del Mercáu de Porrúa que va desenvolvese dende les 12 del mediudía na plaza circular conocida como “El Parque”, que consta de dos aníos d’árboles, y un quioscu, obra del arquiteutu racionalista Joaquín Ortiz.

El Mercáu de Porrúa foi pioneru nesti tipu d’eventos qu’agora abonden por tola xeografía asturiana, siendo una de les celebraciones que más aforu allega de toles fiestes llanisques, a pesar de ser un tipu de fiesta de “nuevu cuñu”. El marcu en que se desenvuelve fai que sía un acontecimientu singular y de gran aceptación para tou tipu de visitantes. Al mandu de la so organización ta l’Asociación Cultural Llacín, que destaca polos sos planteamientu culturales novedosos dende fai yá venti años.

Una traza particular d’esta celebración ye la numberosa participación de tolos vecinos del pueblu de Porrúa, que collaboren de manera desinteresada nun gran númberu de los puestos que la organización prepara: un chigre, una plancha, una parrilla, pinchos, frixuelos, churros, tortos, café y llicores. Amás, el Mercáu ye un escapate d’artesanía y d’espectáculos, enxareyaos a lo llargo de dos díes completos, onde la vestimienta xuega un papel singular. Solamente del pueblu de Porrúa vístense aprosimao 200 persones.

Nel apartáu d’artesanía cuntase con unos 95 puestos d’artesanos, de los cualos dellos van ser talleres en vivu, y que van dexar al visitante conocer dellos oficios en directu ( ferreru, madreñeru, acebacheru, cesteru, ceramista, lloquereru, luthier de gaites, filanderes, artesanos de la madera, del cueru, etc.)
Completen el conxuntu de paraes los artesanos con esposición y vienta de los sos productos.

Mientres tou la fin de selmana va haber distintes actuaciones de música, baille, teatru de cai y xuegos tradicionales. L’entamu de cada xornada va ser a les 12 del mediudía y va estendese hasta bien entrada la nueche, siendo l’actuación principal la “Nueche Mitolóxica” na nueche del sábadu.